Koronaboahkuid registreret SYSVAK:i maŋŋilgihtii

-Sii geat leat válddihan koronaboahkuid olgoriikkas sáhttet dál boahkuid registreret maŋŋilgihtii ja oažžut ruoná koronaduođaštusa, ja sii eaige dárbbaš šat mannat dábálaš mátkkoštanerremii dahje oaniduvvon erremii, dadjá dearvvašvuođa- ja fuolahusministtar Bent Høie.  

Buohkat geat ollásit leat boahkuhuvvon eurohpálaš dálkkasbearráigeahčču (EMA) dohkkehuvvon koronaboahkuiguin eai dárbbaš šat mannat mátkkoštanerremii go bohtet riikii. Mii leat geavahan veaháš áiggi ráhkadit SYSVAK-registarii sierra čovdosa registreret koronaboahkuid mat biddjojuvvojit olgoriikkas, ja oažžut sadjái registrerennjuolggadusaid. 

Čoavddus lea dál sajis, nu ahte boahkut mat addojit olgoriikkas galget dál registrerejuvvot vai sáhttá earuhit gaskal Norgga ja olgoriikka boahkuhemiid, mii Norgga koronaboahkuhanprográmma čuovvoleapmái lea dehálaš. Dasa lassin lea dehálaš ahte ÁDI oažžu rivttes dieđuid das man ollu norgalačča leat boahkuhuvvon ja man galle boahkkodosa leat biddjon Norggas.

E-konsultašuvdna ovdal Norgii boahtima
Don sáhtát registreret ovdal go vuolggát Norgii. Jeara konsultašuvnna iežat fástadoaktáris, gielddadearvvašvuođabálvalusas dahje priváhta dearvvašvuođabálvalusas Norggas registreret olgoriikkas biddjon boahkuid.  

Don berret čađahit e-konsultašuvnna/videokonsultašuvnna, gos doavttir beassá oaidnit boahkuhanduođaštusa, ja árvvoštallat lea go dat dohkkehahtti vai ii.

Buot boahkuheamit mat addojit galget registrerejuvvot sierra journálii, lassin SYSVAK boahkuhanregistarii. 

-Lea dehálaš ahte dearvvašvuođabargit geat maŋŋilgihtii galget registreret boahkuhemiid ožžot dohkálaš bagadallama, vai sii leat oadjebasat ahte dieđut leat nu riekta go vejolaš. Bagadallanneavvu gávdno dál FHI neahttasiidduin, dadjá Høie.

Buohkat geat jerret konsultašuvnna čađahit registrerema maŋŋilgihtii fertejit ieža máksit dan ovddas. Jos registreren čađahuvvo fástadoaktára luhtte, de ferte máksit olles iežasoasi, danne go dat ii gokčojuvvo doarjjabušeahta bokte. 

Dušše EMA-dohkkehuvvon koronaboahkut
ÁDI ávžžuhusaid vuođul galget dušše EMA-dohkkehuvvon boahkut registrerejuvvot maŋŋilgihtii SYSVAK:i. Sorjjakeahttá gos máilmmis boahkut leat addojuvvon. Mii diehtit ahte EMA-dohkkehuvvon boahkuin lea kvalitehta, ja ahte dat leat beaktilat ja sihkkar, ja buot boahkut mat Norggas addojuvvojit galget leat EMA-dohkkehuvvon. Maŋŋil sáhttá árvvoštallat galgá go boahkuid maid EMA ii leat dohkkehan registreret SYSVAK:i maŋŋilgihtii. 

Dat boahkut eai atte vuoigatvuođa spiehkastit mátkkoštanerrennjuolggadusain  dahje oažžut ruoná koronaduođaštusa.    

ÁDI almmuha maŋŋilgihtii registrerennjuolggadusaid. Loga eanet FHI.no siidduin.