Oanidit errenáiggi suodjaluvvon olbmuide ja vuollel 12-jahkásaš mánáide go mátkkoštit riikii

- Sisamátkkoštanerren lea dehálaš doaibmabidju eastadit ahte čuovvu njoammun deike. Lea ain riska ahte sáhttá njoammut suodjaluvvon olbmuide ja ahte sii njoam­mudit earáid, muhto dat riska lea mihá unnit go jus ii leat suodjaluvvon. Dan dihte oaivvildit mii ahte lea dohkálaš oanidit errenáiggi dán jovkui, dadjá dearvvašvuođa- ja fuolahusministtar Bent Høie.

Eaktu beassat eret sisamátkkoštanerremis lea negatiiva PCR-teastaboađus mii lea váldojuvvon áramustá golbma jándora maŋŋel go lea ollen mátkkis. Dakkár iskkus unnida njoammunriskka gaskkal 75 ja 90 proseanttain go buohtastahttá dainna ahte ii teste dahje mana erremii. Dan ferte sáhttit duođaštit ahte lea suodjaluvvon, dan bokte ahte sisačáliha helsenorge.no-siidui, ovdamearkka dihte jus várohuvvo rihkkumis errengeatnegasvuođa.

Oanehit erren mánáide
FHI mielde njoammudit mánát earáid unnit go rávisolbmot, ja riska ahte dávda lea njommon mánáide vuollel 12-jagi, lea 50 proseanta unnit go rávisolbmuid dáfus.

- Dan vuođul oaivvilda Dearvvašvuođadirektoráhtta ja FHI ahte dat seamma njuolg­gadusat sisamátkkoštanerrema birra maid mii dál ásahit suodjaluvvon olbmuide, maiddái berrejit guoskat vuollel 12-jahkásaš mánáide. Ráđđehus doarju dan, dadjá Høie.

Ráđđehus lea sihtan Dearvvašvuođadirektoráhta ja FHI árvvoštallat ahte sáhttet go gaskkal 12- ja 18-jahkásaš nuorat maid iskkahit iežaset eret sisamátkkoštanerremis negatiiva PCR-teasttain mii váldojuvvo golbma jándora maŋŋel.

- Mii diehtit dál eanet, ahte okta boahkkodosa soaitá suddjet unnit delta-virushámi vuostá. Dan dihte sáhttet boahtit iešguđetlágan njuolggadusat sidjiide geat leat gárvásit boahkuhuvvon. Nu go ovdal leat dieđihan, de áigot Dearvvašvuođa­direktoráhtta ja FHI ođđasis árvvoštallat goas sii geat leat gárvásit boahkuhuvvon oalát besset spiehkastit sisamátkkoštanerremis, dadjá Høie.

Ráđđehus lea dál kárteme dollet go eará riikkaid koronagoarttat dahje sullasaš čovdosat seamma dási kvalitehtagáibádusaid hárrái nu movt Norggas, ja ahte sáhttá go daiguin beassat eret errengáibádusain, ja mainna lágiin dieđut sáhttet duođaštuvvot.

Eai ávžžut mátkkoštit olgoriikii
Ráji nalde jotket ain testemiin, earret eará vai nagodit gozihit fuolastahtti virushámiid. Dat joatkkašuvvo nu guhká go lea dárbbašlaš ja ávkkálaš. Visot mátkkošteaddjit, maiddái suodjaluvvon olbmot, fertejit ráhkkanit testejuvvot go ollejit Norgii. Ráđđehus ii ávžžut ovttage dárbbuhemiid mátkkoštit olgoriikii.

Sisamátkkoštanerrema rievdadusat suodjaluvvon olbmuide ja mánáide vuollel 12-jagi biddjojuvvojit fápmui geassemánu 4. beaivvi diibmu 15.00.

Dát lohkkojuvvojit suodjaluvvon:

• olbmot geat leat gárvásit boahkuhuvvon
  
  
• olbmot geat lea ožžon vuosttaš dosa, ja lea vássán 3-15 vahkku dan rájes go ožžo dan
  
  
• olbmot geain lea leamašan korona maŋemus guđa mánus