Doaibmadási A gaskaboddasaš rievdadeapmi

- Go doaibmadássi A ásahuvvui, de eat jurddašan ahte dat bisttášii nu guhká. Go aiddobáliid leat guhkidan doaibmadási A gustoma 20 gielddas Vikenis, de dat mearkkaša ahte ássit fertejit eallit čavgadeamos ráddjehusaiguin lagabui guhtta vahku. Go dál gaskaboddasaččat rievdadit doaibmadási A ráddjehusaid, de sávvat ahte dat eai čuoza nu sakka gielddaid olbmuide, dadjá dearvvašvuođa- ja fuolahanministtar Bent Høie.

Gielddain, main lea doaibmadássi A, leat universiteahtat, allaskuvllat ja fágaskuvllat leamaš gitta buot studeanttaide. Cuoŋománu 16. beaivvi rájes sáhttet campusiid doallagoahtit rabas, jos lanjat leat mávssolaččat studeanttaide, geat leat sorjavaččat geahččalemiin dahje gálggaid oahpahallamis, maid ii sáhte dahkat digitála vugiiguin, ja go dat dárbbašuvvo oahpu ovdáneami dáfus, ja go studeanttat válddihit jeavddalaččat covid-19-iskosiid gieldda njoammuneastadaneiseválddiid rávvagiid mielde.

Maiddái girjerájuid ja lohkanlanjaid sáhttet doallat rabas studeanttaide, geat jeavddalaččat válddihit covid-19-iskosiid.

Rássegávppit besset leat rahpasat dain gielddain, main lea doaibmadássi A, jos daid vuovdinlanjat eai leat viidáseappot go 250 njealjádasmehtera, ja go gávpi vuovdá eanaš rásiid, mat goldnet johtilit.

Maŋŋebárgga, cuoŋománu 13. b. almmuhuvvui maid, ahte doaibmadásis A rievdadit guokte ášši, mat gusket njunušvaláštalliide: Njunušvaláštalliid organiserejuvvon hárjehallan šaddá lobálažžan cuoŋománu 13. b. diibmu 16 rájes, ja spábbačiekčama guovtti bajimuš divišuvnnas besset čiekčat hárjehallančiekčamiid gaskaija rájes, cuoŋománu 16. beaivvi čuovganeapmái. Dušše čiekčit, doarjjaolbmot ja duopmárat besset searvat hárjehallančiekčamiidda.

 

Geahčadit buot golbma doaibmadási, mat leat ráhkaduvvon guovlluid várás 
Dearvvašvuođadirektoráhtas ja Álbmotdearvvašvuođainstituhtas geahčadit ja muddejit viidáseappot guovlluid doaibmadásiid (doaibmadásiid A, B ja C) ollislašvuođa.

- Doaibmadássi A gáibida ollu ássiin, geaidda dat gusto, muhto mii dárbbašit doaibmadási reaidun, mainna johtilit ja beaktilit bissehit njoammumiid oanehaš áigodagas. Dearvvašvuođadirektoráhtas ja Álbmotdearvvašvuođainstituhtas geahčadit dál sáhttágo doaibmadásiid B ja C heivehit buorebut guovlluide, main dárbbašit garra ráddjehusaid guhkit áigodagas. Ulbmilin lea geahpedit vehá daid olbmuid dili, geat orrot dáid guovlluin, dadjá Høie.

Geahpedit riikkaviidosaš ráddjehusaid olgohárjehallama birra Dearvvašvuođadirektoráhta ja Álbmotdearvvašvuođainstituhtta leat árvalan ávžžuhusa, man mielde 20 ollesolbmo sáhttet searvat organiserejuvvon olgodoaimmaide. Ráđđehus doarju dan. Ávžžuhus boahtá fápmui oktanaga eará riikkaviidosaš ráddjehusaid rievdadusaiguin, gaskaija, cuoŋománu 16. b. čuovganeapmái.

Ávžžuhus:

• Ollesolbmot sáhttet searvat organiserejuvvon olgodoaimmaide eanemustá 20 olbmo joavkkuin, nu guhká go sii nagodit doallat unnimustá mehtera gaskka.