Nannejit gielddaid fálaldaga gárrenmirkkuin sorjavaččaide

Ráđđehus háliida nannet gárrenmirkosorjavaččaid ja psykihkalaš váttuin gillájeddjiid fálaldaga. 2014 stáhtabušeahta lassin ráđđehus árvala várret 343 miljovnna kruvnno gielddaid gárrendoaimmaide, ja joatkit ain skuvlla psykihkalaš dearvvašvuođa ortnega ruhtadeami, mii lei árvaluvvon heaittihuvvot.

- Mii háliidit loktet sin, geat leat vuolimus dásis dearvvašvuođabálvalusas. Danin mii áŋgiruššat nannoseappot gárrenmirkkuin sorjavaččaid ovdii ja olbmuid ovdii, geain leat psykihkalaš gillámušat, go ovddidit boahtte jagi stáhtabušeahta árvalusa, dearvvašvuođa- ja fuolahanministtar Bent Høie dadjala.

Ráđđehus lea 2014 stáhtabušeahta lassin árvalan nannet áŋgiruššama gárrensuorggis ja psykihkalaš dearvvašvuođa suorggis dán láhkai:

• Merket ruđaid gielddaid gárrendoaibmabijuide
• 200 saji lasáhus galgá maid sisdoallat lasi guhkes áigodaga sajiid
• 255 miljovnnain ostet eanet priváhta bálvalusaid gárren-, psykihkalaš dearvvašvuođa ja veajuiduhttima suorggis
• Eat geahpetge skuvlla psykihkalaš dearvvašvuođaortnega ruhtadeami
• Juolludit eanet doarjaga Fontenadáluide

Gielddaid merkejuvvon ruđat

Ráđđehus áigu merket 343 miljovnna kruvnno gielddaid gárrendoaibmabijuide. Dan láhkai rievdadit 2013 mearrádusa, man mielde gielddaid gárrendoaibmabijuid doarjja galggai gullat gielddaid rámmii. Doarjagiin áigot duođas bajidit gielddaid ollislaš gárrenmirkosuorggi barggu kapasitehta ráđđehuscealkámuša doaimmaid vuođul.

- Mii dárbbašit ain gárrensuorgái várrejuvvon doarjaga. Várrejuvvon ruđaiguin gielddat sáhttet ovddidit buoret bálvalusaid, ovdamearkka dihte eanet vuostáiváldinguovddážiid stuorra gávpogiin ja buoret divššu dálkkodeami ja gárrenmirkkuin gáidadeami maŋŋá, ja ahte njuovžileappot beassá mirkkuin gáidadeamis veajuiduhttimii, Høie dadjala.

200 ođđa dálkkodansaji

Ráđđehus áigu johtilit lasihit gárrendálkkodeami sajiid ja oastit guoros sajiid. Ovddit ráđđehusa árvalusa mielde galge 2014 šaddat sullii 200 dálkkodansaji lasi. Ráđđehus doalaha árvalusa, muhto viiddida doaibmabiju, nu ahte dasa galget gullat maiddái gárrenmirkosorjavaččaid guhkes áiggi sajit. Lassáneami ollašuhttet ideála doaimmaid oastimiiguin.

- Mii áigut fuolahit, ahte buot buorit fámut geavahuvvojit, ja ahte ideála doaimmaide sihkkarastet guhkes áiggi šiehtadusaid, Høie dadjala.

Ráđđehus áigut maid váldit ođđasit atnui geavada, man mielde gárrenmirko- ja psykihkalaš dearvvašvuođa suorgái oktiibuot juolludit juohke jagi eanet lassiruđa go somatihkkii.

Eai geahpetge skuvllaid psykihkalaš dearvvašvuođa ortnega ruhtadeami

Ovddit ráđđehus áiggui geahpedit skuvlla psykihkalaš dearvvašvuođa ortnega ruhtadeami. Ođđa ráđđehus bisseha geahpádusa ja juolluda 17, 6 miljovnna kruvnno dasa.

- Mii fertet álgit árrat, jos mii áigut nagodit eastadit psykihkalaš váttuid. Mii fertet danin nannet – eatge geahnohuhttit – ovddalgihtii eastadeaddji barggu mánáid ja nuoraid gaskkas. Skuvlla psykihkalaš dearvvašvuođa ortnet lea jo olahan ollu mánáid ja nuoraid, ja dan olis dahket dánge jagi mávssolaš ovddidanbargguid, Høie cealká.

Skuvlla psykihkalaš dearvvašvuođa ortnet lea doarjjaortnet, man olis organisašuvnnat sáhttet oažžut doarjaga prográmmaide, maid ulbmil lea lasihit ohppiid ja oahpaheddjiid máhtu ja áddejumi psykihkalaš dearvvašvuođa hárrái.

Lasihit doarjaga Fontenadáluide

Ráđđehus árvala nannet golmmain miljovnnain kruvnnuin mávssolaš barggu, maid Norgga fontenadálut (fontenehusene) barget.

- Dat ahte doarjut fontenadáluid ja addit sidjiide vejolašvuođa joatkit bargguset, lea mávssolaš vuohki veahkehit olbmuid, geain leat psykihkalaš váttut, vai sii besset fas máhccat bargui, Høie dadjala.

Fontenadálut leat ámmátlaš iežas veahkeheami prográmmat, maid jođihit olbmot, geat ieža leat veajuiduhttimis dahje geain lea psykihkalaš gillámuš.