Ráđđehus álggaha barggu ásahit goddinregistara Norggas

-Goddinregisttar sáhtašii midjiide addit ávkkálaš ja systemáhtalaš dieđuid goddináššiin. Dat lea dehálaš ahte mis leat dieđut goddindáhpáhusaid birra, vai sáhttit buoridit dearvvašvuođabálvalusaid ja buorebut čuovvolit sin geat balahuvvojit dahkamis duođalaš veahkaválddálašvuođa, cealká fuolahusministtar Bent Høie.

Politiijat eai galgga registara geavahit veahkkeneavvun ohcat vejolaš vearredahkkiid dahje riskaolbmuid. Dat lea dábálaš ahte persovdnadieđut registaris eai almmuhuvvo.
-Goddinregistara galget dutkit geavahit, muhto politiijai lea dehálaš geavahit dutkanbohtosiid. Buoret diehtu goddinsivaid birra sáhttá váikkuhit dasa ahte šaddá álkibun eastadit dákkár vearredaguid, dadjá justiisa- ja gearggusvuođaministtar Anders Anundsen.

Goddinregisttar – dutkanvuđot ortnet

Bissovaš goddinregistara ásaheapmi addá mávssolaš máhtovuođu dutkat goddindáhpáhusaid Norggas. Dákkár registtar addá buorre vuođu dasa ahte dađistaga analyseret buot goddináššiid Norggas. Áigeguovdilis dieđut registarii sáhttet leat demográfalaš dieđut, ovddeš vearredagut, oktavuođat gillájeaddjái, vearredahkki dearvvašvuohta ja oktavuohta dearvvašvuođabálvalusain, goddinvuohki/vearju ja mirkkogeavaheapmi dáhpáhusa oktavuođas. Ollu eará riikkat, earret eará Englánda ja Suopma leaba ásahan sullasaš ortnegiid. 

Duogáš ásahit goddinregistara

Barggu duogáš lea Olsenlávdegotti NAČ ávžžuhus (Norgga almmolaš čielggaddeapmi) 2010. Olsenlávdegoddi nammaduvvui dan geažil go áigodagas 2004 – 2009 dáhpáhuvve ollu goddimat Norggas gos temá leai vearredahkki psyhkalaš váttut dahje mirkkogeavaheapmi.
Gulaskuddamis Olsenlávdegotti NAČ maŋŋá, ledje gulaskuddanásahusat Advokáhttasearvi, Mánáidáittardeaddji, Stáhta dearvvašvuođabearráigeahčči, Kripos, Politiijadirektoráhtta ja Álbmotdearvvašvuođainstituhtta positiiva dasa ahte ásahit goddinregistara.

Goddinregisttar gáibida láhkarievdadusa

Dat ahte čohkket ja registreret dieđuid goddinregistarii gáibida láhkarievdadusa. Láhkarievdadeapmi galgá čielggaduvvot vuđoleappot. Áššiid maid ferte árvvoštallat leat earret eará sihkkaris vurken ja movt gieđahallat hearkkes persovdnadieđuid ja dieđuid maid ii oaččo almmuhit jávohisvuođageatnegasvuođa geažil. Galgá maid čielggaduvvot geas galgá leat ovddasvástádus jođihit dákkár ortnega.
Dearvvašvuođa- ja fuolahusdepartemeanta galgá mearridit juridihkalaš vuođđobarggu. Departemeanta rehkenastá ahte gulaskuddannotáhta válbmana vuosttas jahkebealis 2015.