Báhtareaddjit sáhttet manahit orrunlobi

– Bagadus lea dorvoohccigeavada dehálaš čavgen. Sii geat eai šat dárbbaš suodjalusa, fertejit máhccat iežaset ruovtturiikii ja veahkehit cegget riikka fas go lea oadjebas, dadjá sisafárren- ja searvadahttinministtar Sylvi Listhaug (Ob).

Loga bagadusa dás  

Bagadus čuovvola Bargiidbellodaga, Olgešbellodaga, Ovddádusbellodaga, Kristtalaš Álbmotbellodaga, Guovddášbellodaga ja Gurutbellodaga skábmamánu 19.b. 2015’ šiehtadusa doaibmabijuid ektui dustet báhtareaddjikriissa. Báhtareaddjikonvenšuvdna rahpá dákkár máhcaheami gohččumii go ii leat šat dárbu riikkaidgaskasaš suodjalussii.

– Ii Norga eai ge eará eurohpálaš riikkat leat geavahan dán vejolašvuođa áktánasat dássážii. Bagadus mielddisbuktá stuorra geavatrievdadusaid olgoriikalaččaidsuorggis, dadjá Listhaug.

Bagadusa mielde galgá Olgoriikkalaččaiddirektoráhtta (UDI) árvvoštallat orrunlobi máhcaheami jus sihkkarvuođatlaš, politihkalaš dahje olmmošrievttálaš dili rievdadusat olgoriikkalačča ruovtturiikkas čájehit ahte lea dorvvolaš máhccat ruovttoluotta. Maiddái áššiin mat orrot čájeheamen ahte ii leat šat dárbu suodjalussii, galgá UDI árvvoštallat orrunlobi máhcaheami, ovdamearkka dihtii jus leat čielga dieđut mat čájehit ahte lea dorvvolaš máhccat ruovttoluotta. Dasto sáhttá UDI vuolggahit ášši máhcahit orrunlobiid dakkár diliin mas eará bealit čájehit ahte olgoriikalaš ii šat dárbbaš suodjalusa.

Bagadusa ii gusto kvohtabáhtareddjiide ii ge báhtareddjiide geat leat jo ožžon bistevaš orrunlobi dahje orrunlobi humanitára vuođu vuođul.

Jus orrunlobi máhcaheami eavttut leat devdon, de galgá UDI árvvoštallat lea go vuođđu orrunlohpái go leat nana olmmošlaš vuhtiiváldimat dahje erenoamáš čanastumit Norgii, dahje jus riikkaidgaskasaš geatnegasvuođat čájehit ahte ferte addit orrunlobi.