Pássaláhka ja ID-koartaláhka rievdaduvvo – mátkedokumeanttaid biehttaleapmi

Rievdadusat galget váikkuhit dasa ahte šaddá álkit biehttalit dahje sihtat pássa máhcahit jos lea ágga jáhkkit ahte mátki ulbmil lea rihkkut ráŋggáštuslága mearrádusaid olmmošgoddimiid birra, dahje vearredagut olmmošsohkagotti vuostá, soahtekriminalitehta, lobihis searvan vearjoriidduide olgoriikkas, terrordagut ja terrorvuđot dagut.  

-Lea hui dehálaš ahte gávdnojit beaktilis váikkuhangaskaoamit mat hehttejit olbmuid vuolgimis riidoguovlluide, heađuštan dihte duođalaš vearredaguid dáid guovlluin ja maiddái dan sivas go sii sáhttet leat áittan Norgii ja norgga beroštumiide go bohtet ruovttoluotta, dadjá justiisa- ja gearggusvuođaministtar Anders Anundsen (OvB).   

Rievdadusárvalus guoská dušše pássa ja nationála ID-koarta mátkkoštanvuoigatvuhtii, ja dat ii čuoza mange láhkai norgga stáhtalahttuvuhtii.

Dálá láhkamearrádusat gáibidit ahte lea jáhkehahttimuš ahte ulbmil mátkkiin lea lobihis doaibma. Rievdadusárvalusa mielde ii gáibiduvvo jáhkehahttimuš, muhto objektiivvalaš árvvoštallan ahte olmmoš áigu čađahit lobihis doaimmaid.

-Pássa biehttalus lea duođalaš doaibmabidju maid ii galgga geavahit earret jos dasa leat erenlossa ákkat, ja máŋga mekanismma galget dan vuođuštit, cealká Anundsen.

Jos vel buot eavttut leat ge ollašuvvon, de galgá juohke áidna áššis konkrehtalaččat árvvoštallat pássa biehttalandárbbu. Mearrádus galgá gieđahallojuvvot eaŋkilmearrádussan, mii galgá vuođuštuvvot ja dan galgá sáhttit váidalit. Mearrádusa sáhttá maid ovddidit duopmostuoluid ovdii. Árvalus lea vuđolaččat árvvoštallojuvvon Vuođđolága gáibádusaid ja riikkaidgaskasaš geatnegasvuođaid ektui.