Ráđđehusas doarjjaortnet olgoriikka bargiid várás Longyearbyenis

- Dat lea ávkin geahpedit fáhkka ja váttis dilálašvuođa masa muhtumat dál leat gártan, lohká justis- ja gearggusvuođaministtar Monica Mæland (O).

Njukčamánu 20.beaivvi dieđihii justis- ja gearggusvuođaministtar Monica Mæland ahte Justis- ja gearggusvuođaministtar barggai sierra, áigeráddjejuvvon doarjjaortnegiin olgoriikka bargiid várás Longyearbyenis. Ortnega ulbmil, mii dál lea gárvvis ja mearriduvvon, lea sihkkarastit eallinvuođu ovtta áigodahkii olgoriikka bargiide, geat masset sisaboađu koronadilálašvuođa dihte. Longyearbyena báikkálašstivra galgá hálddašit ortnega.

Longyearbyen servodahkii lea garrasit čuohcan heahtedilli mas mii dál leat. Doarjjaortnega ulbmil lea veahkehit permiterejuvvon olgoriikkalaš bargofámu, geaidda min nationála doarjjaortnegat eai gusto, ovdamearkka dihte beaiveruđat, dán fáhkka dilálašvuođas mii lea čuožžilan.

Ortnet lea áigeráddjejuvvon, ja mielddisbuktá ahte sáhttá addot doarjja birgemuššii ja orrundoarjja sosiálaveahkemávssuid mielde. Ortnet gusto gitta 20 beaivái permiterejuvvon olbmuide geat leat registrerejuvvon orrume Longyearbyenis ja geat duođaid leat doppe go ohcet. Eaktu doarjaga oažžut lea ahte permiterejuvvon olmmoš lea máksán Svalbárdda vearu 2020:s.

Dasa lassin sáhttá bargiide geain lea fuolaheaddjiovddasvástádus, mánáide geat leat vuollel 18 jagi, ja geain lea registrerejuvvon orrunáigi Longyearbyenis unnimusat guhtta mánu, addot sierra fuolaheaddjilasáhus. Daidda bargiide gusto ortnet mánnui ain hávális olles áigodahkii gitta geassemánu 20.beaivvi rádjái.

Lea dehálaš fuomášit ahte dát lea áigeráddjejuvvon ortnet, mii galgá veahkkin fáhkka dilis olbmuide geat leat permiterejuvvon dassážii bargui fas besset álgit, dahje sáhttet vuolgit Svalbárddas. Ortnet heaittihuvvo geassemánu 20.b. 2020:s. Dat ii guhkiduvvo.

Ráđđehusas lea jotkkolaš gulahallan Svalbárdda áššeolbmáin (sysselmánniin) ja Longyearbyen gávpotstivrrain, ja čuovvu dárkilit Svalbárdda dili.