Fálesrášša bieggafápmodoaimmahat ii oaččo huksenkonsešuvnna

Aurora Vindkraft AS oaččui ođđajagimánus 2013 konsešuvnna NČE:s hukset ja jođihit gitta 180 MW sturrosaš bieggafápmorusttega Fálesráššas, Fálesnuoris. Konsešuvdnamearrádusa váiddii earret eará dán guovllu boazodoalloorohat.

- Mun lean váiddameannudeamis bidjan erenoamáš deattu dasa ahte bieggafápmorusttega plánaguovlu mearkkaša hirbmat ollu boazodollui, go dán guovllus lea sihke guottetbáiki, bisánanbáiki ja johtingeaidnu. Bieggafápmorusttet livčče mielddisbuktán duođalaš váttisvuođaid ja orohahkii livčče áibbas veadjemeahttun bisuhit boazodoalu dan dásis nu movt dat otne lea.  Mu  árvvoštallama mielde ii gávdno vuođđu addit konsešuvnna Fálesrášša bieggafápmorusttegii,  cealká oljo- ja energiijaministtar Tord Lien.

Oljo- ja energiijadepartemeanta lea seammás meannudeamen váiddaáššiid mat gusket ođđa 420 kV-elfápmolinnjái Báhccavuona ja Skáiddi gaskka. Jođas boahtá  garrasit váikkuhit boazodoalloorohagaide ja buktit uhcit dahje eanet vahágiid. Jođas lea hirbmat dehálaš Davvi Romssa ja Finnmárkku elfápmosihkkarvuhtii, ja departemeanta vuoruha dán ášši hui bajás.  Ođđa elfápmolinnjá váikkuha negatiivvalaččat Fálesrášša orohahkii, ja nu maiddái bieggafápmoprošeakta. Diet guokte doaimma ovttas livčče mielddisbuktán nu stuora negatiivva váikkuhusaid maid dán guovllu boazodoallu ii gierdda.

Oljo- ja energiijadepartemeanta lea maid dohkkehan NČE hilguma SAE Vind konsešuvdnaohcamuššii  Hámmarfeastta bieggafápmodoaimmahaga ektui.