Rávisolbmuid oahppu

Ráđđehus áigu ovddidit ođđa, ollislaš politihka, mii guoská rávisolbmuide, geain leat geahnohis vuođđogálggat. Dan barggu ovdanbuktet stuorradiggedieđáhusas ”Livslang læring og utenforskap", 2015 áigge.

Geahnohis vuođđogálggat ja vuollegis gelbbolašvuohta mielddisbuktet stuorát riskka heaitit oahpus dahje barggus, dahje ahte ii oba beasage bargui. OECD raportta mielde leat sullii 400.000 rávis norgalaččat heajos lohkangálggat. Ollugat sis eai beasa bargui, ja ollugat geat dál leat barggus, gártet álkit bargoeallima olggobeallái áiggi mielde. Daid rávisolbmuid joavku, geat álkit báhcet bargomáilmmi olggobeallái dahje leat dan jo dahkan, lea girjái:

• Nuorra rávisolbmot, geat eai leat barggus eaige oahpus.
• Olbmot, geain lea menddo unnán oahppu, heajos vuođđogálggat ja/dahje váilevaš dárogielmáhttu, vai sii birgešedje bargomáilmmi ain stuorát gáibádusain.
• Sisafárrejeaddjit, geain lea váilevaš dárogielmáhttu dahje oahppu, dahje geaid gelbbolašvuohta ii dohkkehuvvo.

Šaddá mávssolažžan fuomášit ulbmillaš ja buriid doaimmaid namuhuvvon joavkkuide dás ovddos guvlui. Ráđđehus áigu bargat dan ovdii, ahte ovttaskas olbmos livččii gelbbolašvuohta ja vuođđogálggat, maid vuođul son sáhttá oažžut nana bistevaš saji bargoeallimis.

Stuorradiggedieđáhusa olis ovddidit ođđa, ollislaš politihka. Rávisolbmuid oahpu ovddasvástádus ii leat čielggas, ja juohkása dasa lassin máŋgga departementii, direktoráhttii ja hálddašandássái. Dál lea áigi ovddidit ollislaš politihka, mii váldá vuhtii hástalusaid, maid olbmot vásihit, go sii dárbbašit rávisolbmuid oahpu, viiddiduvvon vuoigatvuođa joatkkaoahpahussii dahje eará doaimmaid. Dieđáhusa ráhkadit danin ovttas Máhttodepartemeanta, Bargo- ja sosiáladepartemeanta ja Mánáid, dásseárvo- ja searvadahttindepartemeanta.