Álbmotmeahci hálddahus ásahuvvo Biergái

Biergi Várggáid gielddas šaddá Várnjárgga viiddis suodjalanguovlluid guovddášbáikin. Deike ásahuvvo  boahttevaš luonddumeahcihálddahus kantuvra.
Birasgáhttendepartemeanta lea dál mearridan ásahit guovddáža Biergái Várggáid gielddas. Departemeanta lea mearrádusastis deattuhan ahte Várggáid gielddas leat viiddis areálat mat gullet álbmotmeahccái, ahte vuolggasadji Bierggis álbmotmeahccái eanadieđalaččat lea vuogas ja ahte Várggáid Musea  doaimmat Várggáin leat čadnojuvvon poláradoaimmaide ja lundui.

-Várnjárga lea dehálaš sámi guovlu.  Mun sakka beroštan das ahte sámi perspektiiva fuolahuvvo bures ja čielgasit álbmotmeahci hálddašeamis, cealká biras- ja ovddidanministtar Erik Solheim.

-Álbmotmeahcihálddašeaddji doaibmá álbmotmeahcistivračállin ja vástida suodjalanguovlluid Várnjárgga álbmotmeahcci/Varangerhalvøya nasjonalpark, Biezavuona-Oardduvuona/Persfjorden-Syltefjorden suodjemeahcci ja Oarddu luondumeahcci/Syltefjorden naturreservat.  Birasgáhttendepartemeanta ávžžuha guovddáža ásahuvvot Várjjat Musea doaimmahahkii Bierggis.

-Dasa lassin ahte mii dál oažžut guovddáža Biergái, de illudahttet mu dat áŋgiruššamat mat dahkkojit sámi kulturmuitosuodjaleami oktavuođas Ceavccageađggis Unjárgga gielddas.  Áŋgiruššamat Ceavccageađgis stáhtabušeahta várrejuvvon ruhtajuolludemiiguin daid maŋimuš jagiid čájehit man dehálaš Ceavccageađgi lea sámi kulturmuitoguovlun.  Dát ovttas čielggadanbargguin ahte ásahit Ceavccageađggi vejolaš máilmmiárvoguovlun boahtteáiggis, livčče hirbmat dehálaš sámi árvvuide, lohká Solheim.

Várnjárgga álbmotmeahcistivra nammaduvvui golggotmánu 22.beaivve 2010.  Stivra bargun leai evttohit báikki guovddášhálddahussii.  Departemeanttas lea leamaš čoahkkin njealji guoskevaš gielddaiguin, Várggát, Unjárga, Čáhcesuolu ja Báhcavuotna, ja Sámedikkiin gos hálddahusbáiki lea digaštallojuvvon.

 
Luondduvuođu suodjaleapmi lea maiddái dehálaš sámi kultuvrii ja ealáhusávkkástallamii.  Danne galgá sámi perspektiiva guovddážis álbmotmeahcci hálddašeamis.