- Oarje-Finnmárkku vuosttaš álbmotmeahcci lea ásahuvvon

Gonagas lea odne stáhtaráđis ásahan Sievjju álbmotmeahci. Álbmotmeahcci lea vuosttaš álbmotmeahcci mii ásahuvvo Oarje-Finnmárkui, ja šaddá njealját álbmotmeahcci Finnmárkkus. 

- Sievju lea Finnmárkku nubbi stuorámus suolu, ja álbmotmeahcci suodjala oasi Orje-Finnmárkku eanemusat rámálmas suololuonddus. Illá gostege máilmmis gávdná olmmoš dakkár luonddu go Finnmárkku rittus, dadjá Helen Bjørnøy.

Álbmotmeahcci lea 316,3 km2 stuoru ja dan viidodat juohkása Álttá, Hámmarfeastta ja Fálesnuori suohkaniidda. Sullii 95 % guovllus eaiggáduššá Finnmárkkuopmodat.

Álbmotmeahcis leat eanaš várit ja guokte stuorra jiehkkeguovllu, mat leat nannáma davimusat. Čiekŋalis vuonat juhket sullo dadjat jo guovtti sadjái. Eanemusat alpiidna- hápmásaš ja ceakko eanadat lea sullo oarjjabealde, gos ceaggájit ceakkomus várrečohkat. Suodjalanguovllus lea maid mihtilmas juggás guolbba mas Mielkejohka lea eanadaga guovddáš oassi. Johka lea lihkatkeahtes čázádat jiehkis gitta vutnii, ja lea mielde čázádagaid suodjalusplána IV:s.

Várreguovlluin lea šláddjás ja mihtilmas šattodat, mas leat muhtun hárvves dahje hearkkes várrešattut. Álbmotmeahcis leat ollu máŋggalágan gazzalottit. Doppe bessejit maiddái riddui gulli loddešlájaid smávit nálit.

Doppe vuhtto dat ge ahte olbmot leat ássan jo ruovdeáiggis, ja bođu gávdnosat leat áigáduvvon geađgeáigái.

- Lean ilus go mii dál sáhttit lasihit Sievjju álbmotmeahci álbmotmeahcceplána mearriduvvon suodjalanplánaid searvái. Turisttaide geat galledit Oarje-Finnmárkku, čuovggeha man áidnalunddot ja rašši dát luondu lea. Lean vissis dasa ahte go olbmot muosáhit dákkár luonddu, de lassána seammás dat áddejupmi man dárbbašlaš luonddugáhtten lea davimus guovlluineamet, lohká Bjørnøy.

Suodjalanplána lea ráhkaduvvon gulaskuddaninstánssaid evttohusaid vuođul ja konsultašuvnnaid vuođul Sámedikkiin. Plána lea hábmejuvvon nu ahte guovllu árbevirolaš geavaheapmi sáhttá bisuhuvvot.

Guovlu geavahuvvo earret eará sávza- ja boazoguohtumiidda. Dohko lea maid addojuvvon vejolašvuohta šaddadit skálžžuid ja ávkkástallat minerálaiguin, dainna eavttuin ahte dat ii rihko suodjalanulbmila.

- Ráđđehus lea Sievjju álbmotmeahci ásahemiin čájehan ahte davviguovloáŋgiruššamii gullá davimus ja hearkkimus lundomet suodjaleapmi ge, dadjá Helen Bjørnøy. 

Gulahalli: Ráđđeaddi Geir Paulsen tel. 62 53 11 51 vej 22 24 48 37