Birasgáhttenministtar Helen Bjørnøy:
- Várnjárgga álbmotmeahcci lea ásahuvvon
Historjjálaš arkiiva
Almmustahttináigodat Regjeringen Stoltenberg II
Almmustahtti: Birasgáhttendepartemeanta
Preassadieđáhus | Almmustahtton: 08.12.2006 | Maŋimuš ođasmahttojuvvon: 28.01.2007
- Gonagas lea stáhtaráđis odne ásahan Várnjárgga álbmotmeahci. Dál go suodjalanmeahcci ja luonddumeahcci leat ásahuvvon, de lea dakkár erenoamáš eanadat suodjaluvvon, mas leat dehálaš luondduárvvut.
- Gonagas lea stáhtaráđis odne ásahan Várnjárgga álbmotmeahci. Dál go suodjalanmeahcci ja luonddumeahcci leat ásahuvvon, de lea dakkár erenoamáš eanadat suodjaluvvon, mas leat dehálaš luondduárvvut.
Otná stáhtaráđi mearrádus stuorrudahttá Norgga suodjalanareála sullii 2069 njealjehaskilomehteriin.
- Munnje lea leamaš dehálaš sihkkarastit dakkár guovllu, mii lea eanemusat árktalašlunddot oassi oppa Norgga nannámis. Sihke dat erenoamáš jiekŋaáiggi maŋŋásaš eanahámit ja gearddástusat mat doppe leat, ja main leat nuorta, lulli ja árktalaš šaddo- ja eallišlájat, leat min riikii stuorra riggodahkan, dadjá Helen Bjørnøy.
Várnjárgga eanadat lea geologalaččat hui boaris ja buori muddui hábmejuvvon ovdal jiekŋaáiggiid. Jiekŋa lea guođđán ollu mihtilmas rieggálágan eanahámádagaid mat eai gávdno galli eará sajis máilmmis. 
Šattuid dáfus guovlu lea erenoamáš dan láhkai ahte doppe deaivvadit Davvi-Árktisa, Nuorta-Sibiirra ja máddelet šlájat. Dat lastavuovdeguvlložat mat doppe leat, leat máilmmi davimusaid gaskkas. Luonddumeahcis lea várjjatvalmua (Papaver dahlianum ssp. dahlianum) áidna dieđus váldošaddanbáiki oppa Eurohpá nannámis.
Jeaggeguovllut leat hui mávssolaččat lottiide, eai ge ovtta ge eará sajis Norggas leat oaidnán eanet čuotnjágiid oktanaga earret dalle go dat leat bárbmui johttámin dahje davás boahtimin. 
Kulturmuittuid gávdnosat Várnjárggas duođaštit ahte olbmot leat guhká ja oktilaččat geavahan dáid guovlluid. Boarráseamos kulturmuittut leat áigáduvvon boarráseabbon go geađgeáigásažžan. Várnjárga lea boares sámi ávkkástallanguovlu, ja dáppe leat earret eará ollu sámi bassi- ja bálvvosbáikkit. Meahcásteapmi lea leamaš dehálaš sámi kultuvrras ollu buolvvaid, ja guovlu lea ain hui dehálaš sámi árbevirolaš guovlu. Birasgáhttenministtar deattuha ahte lea leamaš dehálaš hábmet suodjalusa nu ahte báikegottiid árbevirolaš geavaheapmi galgá bistit. Erenoamáš dehálaš lea dat ahte sámi ealáhusat, ja áinnas ge boazodoallu, galget bissut danin mo dál leat.
- Suodjaleapmi luonddugáhttenlága vuođul váikkuha sihkkarastit guovllu dakkár sisabahkkemiid vuostá, mat sáhttet vahágahttit dahje bilidit dehálaš luondduárvvuid. Danne veahkeha suodjalus sihkkarastit luondduvuđđosa nu ahte sámi kultuvra, ássan ja ealáhusdoaibman sáhttet seailluhuvvot, dadjá Bjørnøy. 
Suodjalanmearrádus lea álbmotmeahcceplána (Nasjonalparkplanen (St.meld. nr. 62 (1991 – 92) ”Ny landsplan for nasjonalparker og andre større verneområder i Norge”) čuovvoleapmi.
Riikkaplána ulbmil lea ahte Norgga luonddu ovddasteaddji oasit galget suodjaluvvot luonddugáhttenlága vuođul.
Gulahalli: Eirin Berge, tel. 22 245817