Badjel logi proseantta lassáneapmi Birasgáhttendepartemeantta bušeahtas

Birasgáhttendepartemeantta bušeahtta árvaluvvo lasihuvvot 11,4 proseanttain jagi 2013 stáhtabušeahtas: Luonddušláddjivuođa seailluheapmi, kulturmuito- ja kulturbirassuodjaleapmi, dálkkádatdoaimmat, kárta ja geodáhta ja gávpotguovlluid plánabargguid vuoruheamit leat dehálaš birasdoaimmat.

-Bušeahtta addá stuorra lassánemiid birasgáhttendoaimmaide Norggas. Dálkkádatsuorgi lea okta bušeahttavuoitin mii oažžu logi miljárdda kruvnnu ođasmahtti energiija ja energiijabeavttálmahttin fondii, lasáhusa kollektiivafievrrideapmái ja lassi CO2-buhtadusa. Mii áigut vel vuoruhit juolludemiid kulturmuittuid ja luonddušláddjivuođa seailluheapmái, earret eará lasihit doarjagiid vuovdegáhttendoaimmaide 111 miljovnna kruvnnuin, cealká birasgáhttenministtar Bård Vegar Solhjell.

Lassin Birasgáhttendepartemeantta nanu birasvuoruheami, de leat ollu ja dehálaš birasdoaimmat eará departemeanttaid bušeahtain. Deháleamos doaimmat leat investeremat, ruovdemáđija jođiheapmi ja divodeapmi, masa juolluduvvo 12,4 miljárdda kruvnnu jagi 2013. Dat lea 1,4 miljárdda kruvnnu lassáneapmi. Doaibmaortnet buoridit kollektiivafievrrideami stuora gávpogiin oažžu 262 miljovnna kruvnnu eanet jagis 2013, oktiibuot 673,1 miljovnna kruvnnu.

Dálkkádat, ođasmahtti energiija ja energiijabeavttálmahttin fondii juolluduvvo logi miljárdda kruvnnu. Ráđđehus árvala nannet dálkkádatdutkama oktiibuot 47 miljovnna kruvnnuin. Norgga dutkanráđđi de oažžu jagi 2013 sullii 400 miljovnna kruvnnu dálkkádatguvllot dutkamii. Ráđđehus joatká doaibmabijuid vuovdeáŋgiruššamiidda ovddádusriikkain. Dálkkádateriid oastimiidda ráđđehus árvala 630 miljovnna kruvnnu jagi 2013, mii lea 115 miljovnna kruvnnu eanet go ovdal. Departemeanttaide lasihuvvo oktiibuot 2,9 miljárdda kruvnnuin birasdoaimmaide, 44,3 miljárdda kruvdnui.

Birasgáhttenbušeahta váldočuoggát 2013:

• Birasgáhttendepartemeantta ollislaš bušeahttaárvalus jahkái 2013 lea 5 453,7 miljovnna kruvnnu.  Dát lea 560,2 miljovnna kruvnnu eanet go jagi 2012 bušeahtta.  Lassáneapmi jagi 2005 rájes lea badjel 2,7 miljárdda kruvnnu, mii dahká sullii 100 proseantta.
• Ráđđehus árvala lasihit lagabui 218 miljovnna kruvnnu luonddušláddjivuođa seailluheapmái ja olggustallamii, badjelaš 1,8 miljárdda kruvdnui.  Juolludus ođđa vuovdegáhttendoaimmaide lasihuvvo  111,1 miljovnna kruvnnuin, mii dahká vejolažžan dahkat suodjalanmearrádusaid olu guovlluin gos eaktodáhtolaš suodjalanšiehtadusat leat juo dahkkon.  Álbmotmehciide lasihuvvo sullii 68 miljovnna kruvnnu.  Ráđđehus árvala maid 14 miljovnna kruvnnu gárvvistit ođđa hálddašanmodealla ja nannet suodjalanguovlluid hálddašeami, ja lasihit 22 miljovnna kruvnnu boraspireovttasbarggu čuovvoleapmái.
• Olggustallanbušeahtta lasihuvvo 20 miljovnna kruvnnuin nannosit vuoruhit olggustallama ja álbmotdearvvašvuođa.  Lea erenoamáš dehálaš vuoruhit mánáid ja nuoraid ja láhčit  fálaldagaid dakkár joavkkuide mat muđui eai čuovo olggustallandoaimmaid.
• Ráđđehus árvala lasihit 62 miljovnna kruvnnu kulturmuittuide ja kulturbirasdoaimmaide
• Árvaluvvo ođđa doaibma stuora gávpogiid ektui mii galgá buoridit boahtteáiggi heivehuvvon plánenbarggu, buoridit gávpotbirrasa ja láhčit diliid ođđa viessohuksemiidda.
• Árvaluvvo juolludit 45,6 miljovnna kruvnnu eanaspábbadárkunásahussii Ođđa-Ålesunddas,   ja lasihit logi miljovnna kruvnnu birasdutkamii.  Eará departemeanttat vuoruhit maid birasdutkama, ja ollislaš juolludus lea 47 miljovnna kruvnnu jagis 2013.
• Regina almmustuhttinvuogádaga golut gokčojuvvojit Kártadoaimmahaga stáhtaruđaid bokte 25,8 kruvnnuin.  Divathattit mat gusket iešguđetlágan almmustuhttimiidda leat menddo badjin. Ráđđehus árvala danne geahpedit almmustuhttindivadiid fásta opmodagaide, ja sisaboađut geahpeduvvojit de 385 miljovnna kruvnnuin, 604 miljovnna kruvdnui.    
• Hilgogálvoortnegii lasihuvvo  221 miljovnna kruvnnus 281 miljovnna kruvdnui jahkái 2013.