Boraspiresoahpamuša čuovvoleapmi

Ráđđehus háliida vuoruhit boraspiresoahpamuša doaimmaid 22 miljovnna kruvnnuin, oktiibuot 32 miljovnna kruvnnu jagis 2013. Ollislaš boraspirehálddašanbušeahtta lea dál lagabui 300 miljovnna kruvnnu.

Geassemánu 17.beaivvi 2011 mearridii ovttamielalaš Stuoradiggi ođđa boraspiresoahpamuša. Soahpamuš gáibida lasihit ollu doaimmaid ja ovddidit váikkuhangaskaomiid. Jagi 2012 bušeahtta lasihuvvui logi miljovnna kruvnnuin soahpamuša oktavuođas, ja árvaluvvo ain lasihit jagi 2013 bušeahta.

Ráđđehusa jagi 2013 bušeahtas árvaluvvo oktiibuot 74,6 miljovnna kruvnnu eastadeaddji ja riidováidudeaddji doaibmabijuide. Dát ruđat leat juogaduvvon iešguđet surggiide.

-Mii leat vásihan ahte olu dákkár doaibmabijut veahkehit eastadit massimiid boraspiriid geažil. Erenoamáš doaibmabijut mat sirrejit boraspiriid ja sávzzaid áiggi ja báikki dáfus, nugo rávdnjeáiddit mat doalahit boraspiriid eret, maŋidit luoitimis šibihiid guohtumiidda ja árabut čohkket, cealká birasgáhttenministtar Bård Vegar Solhjell.

Boraspiresoahpamuša oktavuođas lasihuvvo jagi 2013 bušeahtta ja oktiibuot 6,5 miljovnna kruvnnu vuoruhuvvo eastadeaddji- ja riidováidudeaddjidoaimmaide. Boraspiresoahpamušas boahtá ovdan ahte almmolaš suorggi ovddasvástádus boraspirevahágiid ovddas galgá nannejuvvot ja čielggaduvvot, ja ahte sii geat oassálastet gielddalaš bivdojoavkkuin galget oažžut doaibmamávssu vuosttas bivdobeaivvi rájes. Ráđđehus árvala lasihit vihtta miljovnna kruvnnu dákkár doaibmamávssuide. Ráđđehus árvala maid juolludit 1,5 miljovnna kruvnnu Bivdo- ja Guolástusguovddážii maid Norgga Bivdo- ja Guolástussearvi jođiha.

-Go bivdolohpi addojuvvo de lea dehálaš ahte bivdolohpi čađahuvvo. Dán oktavuođas leat gielddalaš ja gielddaidgaskasaš bivdoservviin dehálaš rolla, ja mii árvalat danne lasihit bušeahta viđain miljovnnain máksit bivdoservviid bivdiide doaibmamávssu, dadjá Bård Vegar Solhjell.

Boraspirehálddašeami dehálaš ulbmil lea unnidit giččuid. Ráđđehus árvala danne lasihit 3,7 miljovnna boraspireguovddážiidda. Boraspireguovddážat galget gaskkustit objektiivvalaš, fágalaš riekta ja ođasmahttojuvvon dieđuid ekologiija, hálddašeami ja giččuid birra mat gusket boraspirenáliide Norggas.

Boraspiresoahpamuš áigu nannet neahttabáikki Rovdata ja Stáhta luonddubearráigeahču. Rovdata lea sorjákeahtes lágideaddji getkkiid, albasiid, guovžžaid, gumppiid ja goaskimiid gozihanávdnasiid ektui. Soahpamušas leat ollu oasit mat viiddidit Rovdata doaimma. Ráđđehus árvala lasihit 3,2 miljovnna kruvnnu Rovdatai.

Stáhta luonddubearráigeahčču (SLB) addá earret eará dehálaš dieđuid boraspiriid goziheamis, ja SLB addá doarjagiid go boraspiret spedjet šibihiid ja bohccuid guovddáš guohtunguovlluin. Ráđđehus árvala lasihit doarjaga Stáhta luonddubearráigehččui 4,3 miljovnna kruvnnuin nannet resurssaid boraspirebivddu oktavuođas ja bagadallandoaimmaide boraspiriid birra.

Boraspiresoahpamuš cealká earret eará ahte lea dehálaš unnidit eahpesihkkarvuođa mii guoská vahágiidda maid gonagasgoaskimat dagahit šibihiidda ja bohccuide. Ráđđehus árvala lasihit guokte miljovnna kruvnnu dutkat goaskimiid ja máttasámi boazodoalu.

Ráđđehus árvala jagi 2013 bušeahtas lasihit miljovnna nannet fylkkamánniid gearggusvuođaortnega oanidan dihtii áššegieđahallanáiggi boraspireáššiin. Dasto árvala ráđđehus lasihit 1,3 miljovnna kruvnnu dutkat boraspiriid láhttenvugiid olbmuid ektui.