Ministtarčoahkkin Ubmis miessemánu 19. beaivvi - álgoávnnasresurssat ja energiijabevttolašvuohta deháleamos áššit

Ruoŧa ealáhusministtar bovdii ministtarčoahkkimii Ubmái miessemánu 19. b. digaštallan dihtii Barentsovttasbarggu. Norgga bealde searvvai Ealáhus- ja gávpedepartemeantta stáhtačálli Pål Julius Skogholt .  

Čoahkkimis lahttoriikkat digaštalle vejolašvuođaid ovddidit ealáhusaid regiuvnnas, mas eanaš čalmmustahtte álgoávnnasváriid, energiija ja energiijabeavttálmahttima. Earret eará sohpe bargat dáid áššiiguin viidáseappot ovttasráđiid Bartentsovttasbarggu áššáigullevaš bargojoavkkuin.

Buot oassálastit deattuhedje mávssolažžan rájáidrasttideaddji ja regiuvdnadásiid gaskasaš ovttasbarggu Barentsguovllus.  Dát soahpá maiddái ráđđehusa áigumušaide davviguovlobarggus.   

- Ovttasbargu ja oassálastin guvllolaš forain, dás Baretsovttasbarggus ge, leat ráđđehusa davviguovlobarggu dehálaš oasit , cealká stáhtačálli Skogholt.

Barentsregiuvdna lea rikkis luondduresurssaid dáfus main dehálepmosat leat olju, gássa, minerálat, dimbarat ja guolit. Čoahkkimis stáhtačálli Skogholt deattuhii dehálažžan ovddidit vuođđostruktuvrra go áigumuš lea ávkin geavahit vejolašvuođaid.   – Fievrrádusa ja logistihka ovddideapmi leat guovdilis fáktorat daid resurssaid ávkkástallamis mat leat regiuvnnas, dadjá Skogholt

Čoahkkimis energiijabevttolašvuohta ja ođasmuvvi energiija maiddái digaštallojuvvui Barentsguovllu vejolaš ealáhusovddideapmin. Dáin surggiin leat ollu vejolašvuođat mat eai leat geavahuvvon.  Skogholt dajai earret eará ahte lea dehálaš bargat viidáseappot daid buriid vásáhusaid vuođul mat leat leamaš energiijabeavttálmahttinguovddážiin Davvioarje-Ruoššas.

Stáhtačálli geavahii maid liibba muitalit ”Where gas meets ore” nammasaš konferánssa birra, mii dollojuvvo Girkonjárggas geassemánu 22.-23. beivviid.  Konferánsa lágiduvvo Ruoŧa álgaga vuođul, ja prográmma lea ráhkaduvvon ovttasráđiid Norgga departemeanttaiguin ja dutkan- ja ealáhusbirrasiiguin.

Duohtadieđut Barentsovttasbarggu birra

• Ásahuvvui Girkonjárgga julggaštusain ođđajagemánus 1993.
• Ulbmil lea oaččohit áigái ekonomalaš ja sosiála ovdáneami Barentsguovllus ja dan láhakai váikkuhit ráfálaš ovdáneapmái Eurohpa davimus oasis.
• Barentsovttasbargui gullet 13 fylkka  mat leat Norgga, Suoma, Ruošša ja Ruoŧa davvi osiin.
• Regiuvdna gokčá 1 755 800 njealjedaskilomehtera sturrosaš eanaviidodaga (mii lea viđa gearddi stuorat go Norgga eanaviidodat).
• Doppe ásset 5,54 miljion olbmo, geain sullii 4,5 milovnna orrot Ruoššas.
• Regiuvnna deháleamos resurssat leat olju, gássa, dimbarat, minerálat ja guolit.
• Ruoŧŧa válddii čakčat áigodahkii 2009-2011 badjelasas Barentsovttasbarggu jođiheami mii dan ovdal lei Ruoššas.

Loga čoahkkima ministtarjulggaštusa.