Háliidat rávvagiid ealáhusain álkideapmái

Golbma stáhtaráđi Trond Giske, Liv Signe Navarsete ja Sigbjørn Johnsen almmuhit otne ođđa neahttabáikki álkidahttima birra enklereregler.no. Ealáhusat bovdejuvvojit árvalit álkidahttin doaibmabijuid.

enklereregler.no lea oassin ráđđehusa álkidandoaimmain ealáhusaid ektui.  Neahttasiidduin sáhttet ealáhusat, ealáhusorganisašuvnnat ja earát árvalit movt álkidahttit ja buoridit regeliid, raporterengáibádusaid ja diehtojuohkima.

-Ráđđehusa ulbmilin lea ahte fitnodagat geavahišgohtet eanaš áiggi ealáhusdoaimmaide ja uhcimus áiggi fas hálddahuslaš doaimmaide  doahttalan dihte lágaid ja láhkaásahusaid. Mii dárbbašat ealáhusaid áddejumi ja vásáhusaid álkkásmahttit norgga fitnodagaid guoski lágaid ja regeliid, cealká ealáhus- ja gávpeministtar Trond Giske.

Giske almmuhii borgemánus ulbmila ahte ealáhusaid hálddahuslaš goluid geahpedit 10 miljárdda kruvnnuin ovdal jagi 2015 loahpa.  Ráđđehusas lea dál jođus konkrehta plánat ja doaimmat juksan dihte dán ulbmila, ja árvalusat mat ovddiduvvojit enklereregler.no siidduin šaddet dehálažžan dán barggus.

-Norga dárbbaša ođđahutkiid.  Áinnas dárbbašat ođđahutkiid geat lihkostuvvet ovddidit fitnodagas ja ásahit ođđa bargosajiid miehtá riikka. Danne leat álkidahttindoaimmat dehálaččat buoridit  ođđahutkiid  ja ásahuvvon ealáhusaid dili, dadjá guovloministtar Liv Signe Navarsete.

- Ealáhusbargit fertejit bidjat ilá ollu návccaid hálddašit  vearro- ja divatáššiid. Danne lea dehálaš dilálašvuođaid láhčit buoremus lági mielde vai sii sáhttet čađahit doaimmaidis dárbbašmeahttun hálddahuslaš bargonođiiguin. Olu álkidahttinbarggut leat juo čađahuvvon, muhto ain lea dárbu bargat ain eanet, ja dát dahkkojuvvo buoremusat ealáhusaiguin ovttas, lohká ruhtadanministtar Sigbjørn Johnsen.

Neahttabáiki enklereregler.no deattuha golbma suorggi:

Álkit regelat: Ođđaáigásaš servodagas lea álo dárbu ealáhusaid muddemiidda ja gáibádusaide. Mihttomearrin lea ahte gáibádusat ealáhuseallimii buorebut sohpet  ja ávkki maid muddemat buktet servodahkii.  Neahttabáikkis leat ealáhusdolliin vejolašvuohta ovdanbuktit árvalusaid oalle lossa ja moalkás regeliid birra.

Álkit raporteren: Olmmoš ferte álo árvvoštallat vejolašvuođaid álkkásmahttit raporterenrutiinnaid ja  unnidit áigegeavaheami. Buot duppalgulahallan geavaheddjiid ja almmolaš surggiid gaskkas galgá geahpeduvvot.  Almmolašsuorgi ii sáhte gal olu oktavuođain ložžet raporterengáibádusaid. Almmatge  ealáhuseallin seastá sihke áiggi ja goluid jos raporteren čađahuvvo álkimus vuogi mielde.

Buoret diehtojuohkin: Bures áddehahtti skovit ja bagadusat hehttejit fitnodagain boasttuáddejumiid, boasttuvuođaid ja dárbbašmeahttun áigegeavaheami. Árvalusat leat ávkkálaččat dakkár surggiin gos ealáhusdoallit  oaivvildit ahte lea dárbu eanet diehtojuohkimii dahje bagadallan ferte dahkkot buorebut dahje ođđa vugiiguin.