Boazodoallu: Boazoguohtunšiehtadusa soabadeapmi

Boazodoallu: Stáhta šiehtadallanlávdegoddi ja eanaeaiggátlávdegoddi davábealde Aursundena leat soahpan boazoguohtunšiehtadusa. Šiehtadus galgá láhčit boazodoalu dilálašvuođa dan guovllus gos boazodoallu ii ožžon guohtunvuoigatvuođaid Alimusrievtti mearrádusa bokte Aursundenduomus 1997:s.

Šiehtadallamiid guovddážis lea leamaš gažaldat gokko áidut. Šiehtaduvvon čoavddus mearkkaša ahte váldoáššis áidojuvvojit golbma áiddi. Ulbmilin lea eastadit bohccuid vahágahttimis gittiid, sihkkarastit doarvái meahcceguohtumiid doaibmi šibitdoalliide, ja buoridit sihke eanadoalu ja boazodoalu doaibmandiliid.

 Eaktodáhtolaš čoavddus
- Lea hui buorre go dál lea vejolaš oažžut eaktodáhtolaš čovdosa dán guhkilmas riidui. – Dát čoavddus sihkkarastá buori láhkai sihke máttasámi boazodoalu ja guovllu doaibmi eanadoalliid, dadjá eanadoallo- ja biebmoministtar Terje Riis-Johansen.

Viidáset proseassa
Šiehtadeapmi mearkkaša ahte šiehtadallanlávdegottit áigot dieđihit ja rávvet boazoguohtunšiehtadusa bargoaddiidasaset, namalassii Eanadoallo- ja biebmodepartementii ja guoskevaš eanaeaiggádiidda davábealde Aursundena. Maŋŋágo Eanadoallo- ja biebmodepartemeanta lea meannudan šiehtadusa, áigu departemeanta sáddet vuolláičállimii boazoguohtunšiehtadusa iešguđet eanaeaiggádiidda davábealde Aursundena.

Gulahallit:
Erenoamášráđđeaddi Almar Sagelvmo, tel. 22 24 92 32
Seniorráđđeaddi Morten Floor, tel. 22 24 92 24.