Boazolohku ferte ođđasit mearriduvvot

Eanandoallo- ja biebmodepartemeanta lea fámohuhttán Boazodoallostivrra alimus boazologu mearrádusa čieža orohagain Finnmárkkus. Áššit máhcahuvvojit Boazodoallostivrii ođđa meannudeapmái.

Dás eaktuduvvo ahte Boazodoallostivra váldá oktavuođa guoskevaš orohagaiguin joatki barggu oktavuođas, ja ahte Boazodoallostivra ášši loahpalaččat meannuda ovdal 2011 njukčamánu 15.beaivvi.

Mearrideaddji dássi Eanandoallo- ja biebmoministtar Lars Peder Brekk deattuha ahte Boazodoallostivrra álggahuvvon bargu lea hui dehálaš. - Bargu oažžumis boazodoalu ekologalaš nanaguoddevaš ealáhussan lea dál váttis ja dehálaš dásis. Dát lea dilli earenoamážiid daid guovlluin Finnmárkkus gos odne lea beare alla boazolohku ja guohtunriiddut, dadjá Brekk. -  Dákkár dilis lea earenoamáš dehálaš ahte boazolohku rievdá nu ahte lea heivehuvvon guovllu riggodatvuđđui, deattuha eanadoallo- ja biebmoministtar.

Eanandoallo- ja biebmodepartemeanta lea fámohuhttán Boazodoallostivrra alimus boazologu mearrádusa čieža orohagain Finnmárkkus. Govven: Trym Ivar Bergsmo, Samfoto

- Mun oainnán ahte álggahuvvon bargu lea hástalussan Boazodoalostivrii, dadjá Brekk. - Mun dattetge ollásit luohtán ahte stivra, bures ja dárkilit gulahallá bakte áigeguovdilis orohagaiguin, ođđasit mearrida bajimus boazologu nu ahte dat čielgasit čájeha ja duođašta ahte vástida ekologalaš nanaguoddevaš boazodoalu mihttomeari, cealká eanandoallo- ja biebmoministtar Lars Peder Brekk.

Árvvoštallat Boazodoallostivrra mearrádusa
Boazodoallostivra mearridii čoahkkimis 2010 juovlamánu 9.-10.beivviid alimus boazologu ovcci orohagaide Finnmárkkus. Váttis resursadilli dihte muhtun guovlluin Finnmárkkus, válljii Eanandoallo- ja biebmodepartemeanta árvvoštallat buot dáid mearrádusaid. Departemeanta dieđihii dáid orohagaide reive bakte juo juovlamánu loahpas ahte sii áigo árvvoštallan Boazodoallostivrra mearrádusaid.

Departemeanta lea fámohuhttán Boazodoallostivrra bajimus boazologu mearrádusa čuovvovaš  orohagain:

• 9 Čorgas
• 19 Sállan
• 26 Lákkonjárga
• 27 Joahkonjárga
• 33 Spalca
• 35 Fávrrosorda
• 40 Orda

Ekologalaš nanaguoddevašvuođa
Duogáš dasa go leat fámohuhttán bajimus boazologu mearrádusa dáid orohagain, lea ahte departemeanta ii oainne duođaštuvvon iige jáhkehahttin ahte dát orohagat sáhttet olahit ekologalaš nanaguoddevašvuođa mearriduvvon boazologuin.

Boazodoallostivrra bajimus boazologu mearrádus orohagain 13 Lágesduottar ja 14A Spiertagáisá ii leat fámohuhttojuvvon. Departemeanta mielas lea lunddolaš geahčadit dáid orohagaid bajimus boazologu go iešguđetge jahkodatguohtumiid geavaheapmi lea čielggaduvvon.

• Loga reivve Boazodoallostivrii (pdf, 113 Kb)
• Loga reivve Boazodoallohálddahussii (pdf, 99 Kb)

Geavahannjuolggadusat
Duogáš dasa go Eanandoallo- ja biebmodepartemeanta lea árvvoštallan Boazodoallostivrra mearrádusa, lea dasa go muhtun guovlluin Finnmárkkus lea boazolohku beare allat guohtunvuođu ektui. Jagi 2007 mearriduvvui ođđa boazodoalloláhka man bakte gáibiduvvo ahte orohagat galget hábmet geavahannjuolggadusaid mas siiddaid alimus boazolohku lea oassin. Geavahannjuolggadusaid, mat galget dáhkidit guohtunvalljodagaid ekologalaš nanaguoddevaš ávkkástallama, galget guovllustivrra dohkkehit. Go lea sáhka boazologus, de daid galgá Boazodoallostivra loahpalaččat dohkkehit.

Buot orohagat lea hábmen geavahannjuolggadusaid, ja dat dohkkehuvvojit jagi 2011 mielde.

Ovdasiidogovva: Bohccot guhtot. Govvideaddji: Asgeir Helgestad, Samfoto.