2012/2013 boazodoallošiehtadus – NBR gáibádus

Norgga boazosápmelaččaid riikkasearvi (NBR) geigii ođđajagemánu 9. b. 2012 Stáhtii Eanandoallo- ja biebmodepartemeantta bokte iežas gáibádusa 2012/2013 boazodoallošiehtadusa ráđđádallamiidda. Gáibádusa ruđalaš rámma lea 130,6 miljovnna kruvnno. Dat lea 28,6 miljovnna kruvnno eanet go dálá šiehtadusas, mii fátmmasta 102,0 miljovnna kruvnno.

• Loga NBR olles gáibádusa (pdf, 6 Mb)

NBR árvala doalahit goluid geahpedeaddji ja njuolggodoarjagiid nu, ahte dat vehá dušše muddejuvvojit ja máksomearit lasihuvvojit. Máŋga jagi bistán vuollegaš buvttadeami geažil árvalit erenoamáš doarjaga Tromssa, Nordlándda ja Davvi-Trøndelaga siidaosiide. Doarjja boađášii dálá miessedoarjaga sadjái dain guovlluin. NBR árvala maid konkrehta doaimmaid, maiguin nannejit nissoniid sajádaga boazodoalus ja konkrehta doaimmaid, maiguin sihkkarastet ođđa bargiid háhkama ealáhussii. Gáibádusa mielde lasihit čielgasit maid Boazodoalu ovddidanfoandda ruđa, mainna nannejit earret eará boazodoalu infrastruktuvrra, ja láhčet dilálašvuođaid nu ahte njuovvan ja bierggu vuovdin lassána.

Stáhta ovddida fálaldagas maŋŋebárgga ođđajagemánu 31. beaivvi, ja šiehtadallamiiguin gerget ovdal guovvamánu loahpa 2012.