Boazoeaiggát gohččojuvvo vuojehit bohccuid eret Ávgolatnjárggas

Guovllustivra lea gohččun boazoeaiggáda vuojehit bohccuid eret Ávgolatnjárggas ovdal cuoŋománu 1.beaivve 2012. Guovllustivra lea maid mearridan máksit bággensáhkku jos ferte bákkus bohccuid eret vuojehit maŋŋil cuoŋománu 1.beaivve.  Mearrádus fápmuduvvo jos vel boazoeaiggát váidá ge. Eanandoallo- ja biebmoministtar Lars Peder Brekk (GB) deattuha ahte eiseválddit  eai dohkket ahte bohccot guhtot lobiheamit.

Stáhtaráđđi šálloša go dilli vuot lea nu ahte bohccot leat Ávgolatnjárggas. Diibmá čuožžilii váttisvuohta go Norgga beale bohccot, ja maŋŋil vel Ruoŧa beale bohccot lobiheamit ledje Ávgolatnjárggas. Dán jagi leat Norgga beale bohccot Ávgolatnjággas.

- Bohccot mat leat lobihis guovlluin galget eret vuojehuvvot boazoeaiggáda mávssuin.  Danne sáddejuvvui hálddahuslága mielde diehtu ovddalgihtii  gohččuma birra vuojehit bohccuid eret, jos boazoeaiggát ieš ii daga dan. Danne lean mun duhtavaš mearrádusain mii dál lea dahkkon, cealká Brekk.

Boazodoallolága mielde lea guovllustivra mii mearrida lea go dárbbašlaš bohccuid eret vuojehit ja ráŋggáštusaid, ja sihke hálddahusláhka ja elliidčálgoláhka mearrida rámmaid viidáset čuovvoleapmái.  Guovllustivra meannudii dán ášši njukčamánu 28.beaivve 2012.  Boazodoallolága § 75 mielde lea guovllustivra gohččun boazoeaiggáda vuojehit bohccuid eret Ávgolatnjárggas maŋimuš sotnabeaivvi cuoŋománu 1.b.2012.  Jos gohččun ii ollašuhttojuvvo, de doaibmagoahtá bággensáhkku cuoŋománu 2.beaivve 2012 rájes boazodoallolága § 76 mielde. Jos cuoŋománu 13.beaivve 2012 maŋŋil vel leat bohccot Ávgolatnjárggas, de čohkkejuvvojit ja vuojehuvvojit eret Ávgolatnjárggas lobálaš orohahkii boazodoallolága § 79, 1.lađđasa, nr.1 mielde,  ja goluid šaddá siidaoassi máksit.

Boazodoallohálddahus lea maiddái Ruoŧa beale boazoeaiggádiid fuomášahttán ahte jos johtet bohccuiguin Ávgolatnjárgii, de sii rihkkot gustojeaddji lágaid.  Norgga eiseválddit árvvoštallet čađa gaskka dárbbašlaš bijuid mat hehttejit Ruoŧa beale bohccuid johtimis dán guvlui. Eanandoallo- ja biebmoministtar Lars Peder Brekk čujuha ahte lobihis boazoguohtumat eai galgga dáhpáhuvvat Ávgolatnjárggas, ja dát guoská sihke Norgga ja Ruoŧa boazoeaiggádiidda. 

- Lea boazoeaiggáda ovddasvástádus fuolahit ahte bohccot álo leat lobálaš guovlluin.  Dát lea mearrideaddjin buori  ja doaimmalaš boazodollui, dadjá Lars Peder Brekk.