Nollavišuvdna lihkohisvuođaide eanandoalus

Eanandoallo- ja biebmodepartemeantta politihkalaš ráđđeaddi Ane H. Kismul rabai geassemánu 5.beaivvi eanandoalu vástesaš našunála sihkkarvuođa ja dearvvašvuođa áŋŋgirdeami Habberstad oapmedálus. –Lea duohta dárbu geahpidit lihkohisvuođaid eanandoalus, cealká Kismul.

Dearvvašvuođa, biras ja sihkkarvuođa (DBS)-áŋggirdeapmi galgá bistit 2 jagi ja dat lea boađus stáhta ja Norgga stuorimus šibitdolliid ovttasbarggus.

-Eanandoalus oppalohkkái ja juohke oapmedálus lea dehálaš nannet DBS-doaimmaid. Buohkat geat sáhttet leat mielde buorideamen DBS-doaimmaid eanandoalus fertejit váldit ovddasvástádusa ja figgat oktasaččat geahpidit lihkohisvuođaid, dadjá politihkalaš ráđđeaddi Ane Kismul.

• Loga Ane H. Kismul rahpansártni dás

 -Buorre bargobiras lea buorre investeren juohke fitnodahkii ja ealáhusosolažžii, ja lea maid buorre servodatekonomiija. Eanandollui mearkkaša dát ahte ferte vuoruhit systemáhtalaš DBS-doaimmaid olles ealáhusas ja muđui juohke oapmedálus.  Eanandoalu sihkkarvuođa ja dearvvašvuođa áŋggirdeapmái lea juolluduvvon okta miljovnna kruvnnu eanandoallošiehtadusa bokte, ja lea dehálaš gaskaoapmi lihkohisvuođaid geahpidan barggus, lohká Kismul.

Sihkkarvuohta ja dearvvašvuohta eanandoalus
Áŋggirdeapmi galgá veahkkin eastadeames soardašuvvamiid, lihkohisvuođaid ja bargováttuid eanandoalus. Áŋggirdeami áigodagas lágiduvvojit sullii 700 fágačoahkkima miehtá riikka čuovvovaš temáin: Oadjebas tráktorvuodjin, sihkkareappot meannudit stuora elliid, buollin ja buollinsihkkarastin, gavjjaid easttadeapmi bargobirrasis ja unnidit gahččanváraid ja buoridit dorvvolašvuođa vuovddis.  Eanandoalu DBS-bálvalusas lea fágalaš ovddasvástádus áŋggirdandoaimmain.