Boazodoallošiehtadus 2013-2014
Historjjálaš arkiiva
Almmustahttináigodat Regjeringen Stoltenberg II
Almmustahtti: Eanandoallo- ja biebmodepartemeanta
Ođas | Almmustahtton: 25.03.2013
Ráđđehus lea otne ovddidan proposišuvnna 2013-2014 boazodoallošiehtadusa birra. Proposišuvnnas čilgejuvvo bargu movt heivehit boazologu guohtuneatnamiid ektui.
Ráđđehus lea otne ovddidan proposišuvnna 2013-2014 boazodoallošiehtadusa birra. Proposišuvnnas čilgejuvvo bargu movt heivehit boazologu guohtuneatnamiid ektui.
Dohkkehuvvon šiehtadus joatká nuppástuhttindoaimmaid mat maŋimuš jagiid leat čađahuvvon, ja doaibmabijut galget heivehuvvot sidjiide geain boazodoallu lea váldoealáhussan, cealká eanandoallo- ja biebmoministtar Trygve Slagsvold Vedum. - Dát šiehtadus addá juohke boazodoallái ovdánanvejolašvuođaid ja vejolašvuođaid buoridit sisaboađuid.
109,5 miljovnna kruvnnu
Boazodoallošiehtadusa 2013-2014 rámma lea 109,5 miljovnna kruvnnu. Dat lea 5,0 miljovnna kruvnnu lassáneapmi dálá boazodoallošiehtadusa ektui.
Eambbo bohccuid njuovvat
Dan sivas go doallonjuolggadusaid čuovvoleapmi gáibida njuovvat eambbo bohccuid, de leat šiehtadusoasálaččat deattuhan ahte Boazodoallošiehtadus 2013-2014 galgá erenoamážit vuoruhit doaibmabijuid mat váikkuhit dasa ahte njuvvo eambbo ja vuvdo eanet bohccobiergu. Dán barggus lea mávssolaš bálddalastit boazodoallošiehtadusa gaskaomiid, nu ahte beaktileamos lági mielde juksat mearriduvvon ulbmiliid.
Lasihit buvttadandoarjaga
Boazodoallošiehtadus 2013-2014 dahká aiddo dan go dat láhčá dili dasa ahte olahit boazodoallopolitihkalaš ulbmiliid buot lađđasiin. Boazodoalu siskkáldas struktuvra nannejuvvo. Boazodoallit movttiidahttojuvvojit njuovvat eambbo go buvttadandoarjja oažžu sierra lasáhusa. Oktasaš klassifiserenvuogádat galgá ásahuvvot bohccobierggu várás. Seammás galgá maid ásahuvvot ođđa raporterenvuogádat mii sihkkarastá dađistaga raporteremiid njuovahagain ja viidáset reidenfitnodagain.
Márkanlávdegoddi
Rivttes raporteren lea Márkanlávdegotti bargui mearrideaddjin. Dasa lassin lea Bohccobierggu márkanlávdegotti bušeahtta bajiduvvon vai lea vejolaš buoridit dili boahtte čavčča jođihanáŋgirdemiide. Maiddái galgá boazodoalu siskkáldasstruktuvra nannejuvvot dasa mii guoská njuovvanbohccuide.
Earret buvttadandoarjagiid sierra lasáhusa, de jotkojuvvojit njuolgga doarjagat oppalohkái. Doarjagat lea láhččojuvvon vai sáhttá lasihit bohccobierggu njuovvama ja vuovdima, seammás go dat addá boazodoallái buoret vejolašvuođa ovddasguvlui plánet.
Boazologu heiveheapmi
Proposišuvdna meannuda vuđolaččat dehálaš hástalusaid boazodoalu guovdu. Erenoamáš fuomášupmi lea biddjon boazodoalloláhkii 2007 ja boazologu heiveheapmái guohtuneatnamiid ektui. Proposišuvdna čilge boazologu heiveheami ulbmiliid ja váikkuhusaid dan olis. Dasto čilgejuvvo proseassa man vuođđun leat boazodoallolága 2007 njuolggadusat boazologu heiveheami birra.
