Rievdadeamit boazodoalu hálddašeamis

Ráđđehus lea odne ovddidan proposišuvnna Stuoradiggái boazodoallolága rievdadusaid birra. 

- Mu mielas evttohusat mielddisbuktet ahte mii oažžut boahtteáiggi váste hálddašeami boazodoalus, mii lea buoremussan sihke ealáhussii ja eará servodatberoštumiide, dadjá eanandoallo- ja biebmoministtar Trygve Slagsvold Vedum. 

• Prop. 89 L (2012–2013) Endringer i reindriftsloven mv. (avvikling av områdestyrene)

Earenoamáš hástalus dálá hálddašanvuogádagas lea ahte boazodoallohálddahus lea oalle unna hálddahus, ja das ii leat čanastat eará almmolaš hálddašeapmái. Áiggiid mielde leat oaidnán ahte dát sáhttá dagahit váttisvuođaid earret eará bealátvuođa ja gelbbolašvuođahuksema dáfus. 

Ulbmil rievdadusaiguin lea oažžut čielgaseappot ja beaktileappot hálddašeami, mii sáhttá leat oassin viidát fágalaš birrasis mii obbalaččat addá vuoittuid gelbbolašvuođa dáfus. 

Guovllustivrrat heaittihuvvojit
Proposišuvnnas evttoha ráđđehus ahte guovllustivrrat heaittihuvvojit ja ahte dat váldi mii guovllustivrrain dálá lága mielde lea sirdojuvvo fylkkamánneámmáhiidda. 

Guovllustivrrat leat leamašan oassin boazodoalu almmolaš hálddašeamis Norggas juo 1979 rájes. Dát leat kollegiála orgánat mas leat vihtta dahje čieža miellahtu, maid fylkkadiggi ja Sámediggi nammadit. 

Guovllukantuvrrat fylkkamánniide
Guovllustivrraid válddi sirdin fylkkamánniide eaktuduvvo dáhpáhuvvat paralleallat guovllukantuvrraid hálddahuslaš sirdimiin fylkkamánniide. Fylkkamánni dasto šaddá stáhtalaš guovlulaš fágaeiseváldi boazodoalu almmolaš hálddašeamis, nugo fylkkamánni vástideaddji doaimmat eanandoallosuorggis ja birassuorggis.

 Eaktuduvvo ahte kantuvrrat bisuhuvvojit doppe gos dál leat. Dattege galget dahkkojuvvot fylkkaid mielde proseassat, ja mat dilálašvuođaid geažil sáhttet addit muni eará čovdosiidda jus lea ovttaoaivilvuohta dasa ahte dat lea beaktileamos ja heivvoleamos. 

Stáhta boazodoallohálddahus
Eaktuduvvo ahte Boazodoallohálddahus Álttás bisuhuvvo nugo ovdal. Dat lea dál molson nama Stáhta boazodoallohálddahussii. 

Viidáset galgá guovddáš boazodoallostivra nammaduvvot. Dát lea kollegiála orgána mas Eanandoallo- ja biebmodepartemeanta nammada 4 miellahtu ja Sámediggi 3 miellahtu. 

Eanandoallo- ja biebmodepartemeanttas boahtá ain leat bajitdási fágalaš ovddasvástádus boazodoalu almmolaš hálddašeapmái. 

Sámi mieldeváikkuheapmi ja boazodoallofágalaš máhttu
Sámi mieldeváikkuheapmi ja boazodoallofágalaš máhttu leat seamma dehálaččat dan ođđa hálddašanmodeallas. Departemeanta áigu bovdet Sámedikki ja Norgga Boazosápmelaččaid Riikkasearvvi fárrui ovddideame rámmaid sámi ja boazodoallofágalaš mieldeváikkuheapmái ođđa guovlulaš hálddašeamis.