Bodeaju allaskuvla - 1 600 000 ruvnno

Bodeaju allaskuvla áigu nannet fidnohutkankultuvrra allaskuvllas. Innovašuvdna Norga juolluda 1 600 000 ruvnno allaskuvlla ovddosviggi áŋgiruššamii ođđahutkamiin.

Bodeajus galget guokte boahttevaš jagi earret eará ovddiduvvot gávpejurdagat, gávpeplánagilvu, konkrehta prošeavttaid álggaheami rávven, ja studeanttat galget searvat Nordlándda fitnodagaid iešguđetlágan ođđahutkanprošeavttaide. 

- Bodeajus áŋgiruššet ealáhusat ja dutkanbirrasat ođđahutkamiin daid ođđa vejolašvuođaid vuođul mat leat miehtá Davvi-Norgga. Hui gelddolaš šaddá oaidnit mo dálá studeanttat sáhttet čadnojuvvot vel lagabui dán bargui, cealká gielda- ja guovloministtar Liv Signe Navarsete.

Áigot duvdit fidnohutkiid johtui
Bodeaju  prošeakta lea stuorát áŋgiruššama oassi mii galgá nannet ođđahutkankultuvrra riikka allaskuvllain. Oktiibuot 12,5 milj. ruvnno juolluduvvo logi prošektii 13 allaskuvlii. Ulbmil lea čađahit doaimmaid mat veahkehit studeanttaid jorahit buriid jurdagiid gávpin. 

– Mii diehtit ahte fierpmádahkii beassan, ja leat máhttobirrasa oassin, lea dehálaš easkkaálggahuvvon fitnodagaid lihkostuvvamii. Mii áigut ovttasráđiid bargat oahpahusásahusaiguin veahkehan dihtii rahpat vejolašvuođaid ja oktavuođaid studeanttaide ja vuođđudit buriid jurdagiid vuođul buriid fitnodagaid, cealká Innovašuvdna Norgga hálddahusdirektevra Gunn Ovesen.

Lasiha árvobuvttadeami boaittobeliin
Juohke allaskuvla Finnmárkku rájes davvin Haugesunda rádjai oarjin lea ožžon 2,9 milj. ruvnno rájes 500 000 ruvnno rádjai. Muhtun allaskuvllat áigot čađahit oktasaš prošeavttaid. Innovašuvdna Norga lea meannudan ohcamiid ja juogadan ruđaid prošeavttaide.

– Nuorra olbmuin leat dávjá ođđahutki gávpejurdagat, muhto sidjiide lea váttis ollašuhttit jurdagiiddiset. Dáinna áŋgiruššamiin mii veahkehit duohtan dahkat jurdagiid mat sihkkarastet gelbbolašvuođabargosajiid ja árvoháhkama doaresbeliide ja gávpogiidda miehtá riikka, dadjá gielda- ja guovloministtar Liv Signe Navarsete.

Gielda- ja guovlodepartemeantta preassatelefovdna: 22 24 25 00.