Finnmárkku allaskuvla - 900 000 ruvnno

Finnmárkku allaskuvla galgá nannet fidnohutkankultuvrra allaskuvllas. Innovašuvdna Norga juolluda 900 000 ruvnno allaskuvlla áŋgiruššamii.

Allaskuvla áigu earret eará guokte boahttevaš jagi čuovvolit daid studeanttaid maŋŋá go sii leat geargan oahpus, geain leat gávpejurdagat, earret eará studeantaláddadeaddji bokte. Galgá maiddái leat ovttasbargu ealáhusaiguin áššáigullevaš ođđahutkanprošeavttaid hárrái maiguin studeanttat sáhttet bargat.

Finnmárkkus galget studeanttat searvaduvvot áŋgiruššat mátkeealáhusaiguin ja árktalaš teknologiijain, ja váikkuhit regiuvnna ealáhusaid ovddideapmái, cealká gielda- ja guovloministtar Liv Signe Navarsete.

Áigot duvdit fidnohutkiid johtui
Finnmárkku prošeakta lea stuorát áŋgiruššama oassi man ulbmil lea nannet fidnohutkankultuvrra riikka allaskuvllain. Buohkanassii 12,5 milj. ruvnno juolluduvvojit logi prošektii 13 allaskuvlii. Ulbmil lea čađahit doaimmaid mat veahkehit studeanttaid jorahit buriid jurdagiid gávpin. 

– Mii diehtit ahte fierpmádahkii beassan, ja leat máhttobirrasa oassin, lea dehálaš easkkaálggahuvvon fitnodagaid lihkostuvvamii. Mii áigut ovttasráđiid bargat oahpahusásahusaiguin veahkehan dihtii rahpat vejolašvuođaid ja oktavuođaid studeanttaide ja vuođđudit buriid jurdagiid vuođul buriid fitnodagaid, cealká Innovašuvdna Norgga hálddahusdirektevra Gunn Ovesen.

Lasiha árvobuvttadeami boaittobeliin
Juohke allaskuvla Finnmárkku rájes davvin Haugesunda rádjai oarjin lea ožžon 2,9 milj. ruvnno rájes 500 000 ruvnno rádjai. Muhtun allaskuvllat áigot čađahit oktasaš prošeavttaid. Innovašuvdna Norga lea meannudan ohcamiid ja juogadan ruđaid prošeavttaide.

– Nuorra olbmuin leat dávjá ođđahutki gávpejurdagat, muhto sidjiide lea váttis ollašuhttit jurdagiiddiset. Dáinna áŋgiruššamiin mii veahkehit duohtan dahkat jurdagiid mat sihkkarastet gelbbolašvuođabargosajiid ja árvoháhkama doaresbeliide ja gávpogiidda miehtá riikka, dadjá gielda- ja guovloministtar Liv Signe Navarsete.

Gielda- ja guovlodepartemeantta preassatelefovdna: 22 24 25 00.