47 miljovnna kruvnno ássanmoktii 2011

-Ráđđehus oaidná mávssolažžan doarjut nana álgaga ja beroštumi, maid oaidnit báikkálaš servodagaid ovddideami oktavuođas miehtá riikka. Lean movtta go beasan geiget 47 miljovnna kruvnno doaimmaide, mat ovddidit ássanmovtta ja geasuheaddji báikkálaš servodagaid, gielda- ja guovloministtar Liv Signe Navarsete dadjala.

Gielda- ja guovlodepartemeanta lea vuostáiváldán áigodagas 2006-2009 čađahuvvon nationála smávvaservodatáŋgiruššama árvvoštallanraportta. Dat čájeha ahte nationála áŋgiruššamat doibmet. Dat boktet beroštumi ja johttáhit doaimmaid, ja nannejit movtta bargat báikkálaš ovddidanbargguiguin.

Dál leat gergosat almmuhit ođđa doarjagiid báikkálaš ja guovlludási ássanmoktaprošeavttaide. Buot positiiva dieđuid vuođul, maid Gielda- ja guovlodepartemeanta oaččui diimmá ássanmoktaáŋgiruššamis, ráđđehus lea bidjan 47 miljovnna kruvnno jagi 2011 doarjjan, mii lea 15 miljovnna eanet go 2010. Dat galgá geavahuvvot guovlludási ja báikkálaš ovddidanprošeavttaide olles riikkas.

- Sihke smávvaservodatáŋgiruššan ja ássanmokta čájehit man ollu Norggas leat iešguđetlágan doaimmalaš ja áŋgiris olbmot, geain lea stuorra beroštupmi báikkálaš servodagaideaset. Mun lean danin movtta go beasan leat láhčimin dan ovdii, ahte norgga giliin dáhpáhuvvá nu ollu positiiva, Navarsete muitala.

Ollu gelddolaš prošeavttat leat jo johttáhuvvon 2010 juolludeami rájes. Ovdamearkka dihte ”Seljord og sogene” ja ”Naturgledekommunen Rauma” leat guokte ođđaáigásaš prošeavtta, mat čájehit, ahte kultuvrralaš máŋggabealatvuohta lea mávssolaš vuođđu geasuheaddji báikkálašservodagaide. Illudan beassat oaidnit makkár prošeavttat bohciidit ođđa juolludeami olis, stáhtaráđđi dadjala.

- Ođđa doarjagiid almmuheamis mii deattuhit nannosit prošeavttaid, main láhčet sisafárrejeddjiid ovttaidahttima boaittobealeguovlluin. Mii oaidnit ahte Norgga álbmotlohku lassána ollu dan bokte, ahte olgoriikkas fárrejit deike. Lea mávssolaš, ahte buohkat dovdet iežaset bures boahtin, ja ahte sii ovttaiduvvet bures báikkálaš servodagaide, gosa sii bohtet. Mii dárbbašit eanet gieđaid ja čeahpes olbmuid boahtte áiggis, ja ollu giliservodagaide sáhttet dohko fárren olbmot addit positiiva lassáneami, stáhtaráđđi Navarsete loahpahastá.

Neahttasiiddus www.distriktssenteret.no don oainnát makkár prošeavttaide diibmá juolludedje ruđa.

Gielda- ja guovlodepartemeantta preassatelefovdna: 22 24 25 00.