Vihtta miljárdda kruvnno eanet gielddaide 2012

Ráđđehus árvala, ahte gielddaid boađut lassánit reálalaččat vihtta miljárdda kruvnno 2012. – Realisttalaš bušeahtas mii vuoruhit gielddaid, gielda- ja guovluministtar Liv Signe Navarsete dadjala.

3,75 miljárdda lassánan boađuin juolluduvvojit friddja boahtun. Friddja boađuid lassánemiin gokčet earret eará gielddaid lassigoluid dan oktavuođas, ahte ássiidlohku lassána.

- Bušeahttaevttohusain mii láhčit dili dasa, ahte gielddat sáhttet ain fállat buriid bálvalusaid 2012. Gielddat sáhttet bálkáhit eanet bargiid maiddái boahtte jagi, danin go daid mánáid lohku lassána ain, geat dárbbašit mánáidgárdesaji ja buriid skuvllaid, ja maiddái daid boarrásiid lohku, geat dárbbašit divššu, Navarsete muitala.

Ráđđehus ovddida bušeahta, mainna sihkkarastet bargosajiid ja buori ekonomiija.

- Gielddaid ekonomiija galgá leat nanus ja dearvvas, vai dat sáhttet fállat buriid čálgofálaldagaid miehtá riikka. Ollu Eurohpá riikkat leat jo almmuhan, ahte sii geahpedit ollu almmolaš bušeahtain. Mun lean movtta, go mii Norggas sáhttit ain áŋgiruššat buriid čálgobálvalusaid ovdii, Navarsete dadjala.

- Lea mávssolaš, ahte gielddat jotket nuppástuhttinbargguin ja beavttálmahttimiin, nu ahte gielddat juohke kruvnnuin lágidit buoremus vejolaš bálvalusaid ássiide. Gielddat ja fylkkagielddat galget stivret ekonomiijaset nana gieđain ja heivehit doaibmadási iežaset boađuide, Navarsete cealká.

Friddja boađuid lasiheami lassin ráđđehus árvala erenoamáš áŋgiruššamiid dihto doaimmaide mánáidgárde-, mánáidsuodjalus-, skuvla-, dearvvašvuođa-, fuolahus- ja johtalussuorggis.

Skuvla- ja vuojadanrusttegiid reantobuhtadusortnegiin movttiidahttet gielddaid ja fylkkagielddaid hukset ođđa rusttegiid ja divuhit dálá rusttegiid. Ráđđehus árvala, ahte gielddat ja fylkkagielddat ožžot 2012 buhtadusa reantogoluin, mat vástidit guovtti miljárdda kruvnno investerenrámmii.

400 miljovnna kruvnno fylkkagielddaid boađuid lassáneamis juolluduvvo fylkkagielddaid geainnuid doaimmaheapmái ja bajásdollui. Dan lassin ráđđehus árvala, ahte fylkkagielddat 2012 oččošedje buhtadusa reantogoluin, mat vástidit guovtti miljárdda kruvnno investerenrámmii.

Ráđđehus árvala juolludit investerendoarjaga vel 1500 buhcciidruoktosadjái ja fuolahanásodahkii 2012. Ráđđehus árvala maid ođđa doarjaga demeanta olbmuid beaivefálaldaga álggaheapmái.

Ovttasdoaibmanođastus johttáhuvvo 2012. Ođastusain galgá láhčit dili nu, ahte ássit sáhttet oažžut buoret dearvvašvuođafálaldaga lagabus iežaset ássanbáikki. Gielddat ožžot ođđa doaimmaid dearvvašvuođabálvalusa olis, ja sii ožžot earret eará leat mielde ruhtadeamen spesialistadearvvašvuođabálvalusaid daid olbmuid guovdu, geat besset ruoktot buohcceviesuin. Ráđđehus árvala sirdit 5,6 miljárdda kruvnno gielddaide dáid doaimmaid ollašuhttimii. Ráđđehus fuolaha maid das, ahte oktage gielda ii galgga táhpet nuppástuhttimis, ja bidjá danin 305 miljovnna kruvnno friddja boađuid lassáneamis buhtadussan ovttaskas gielddaide.

Iešguđet gielddaid logut:

• Finnmárku oažžu 221 miljovnna eanet boahtte jagi
• Nordlánda oažžu 644 miljovnna eanet boahtte jagi
• Romsa oažžu 383 miljovnna eanet boahtte jagi.

Gielda- ja guovludepartemeantta preassatelefovdna: 22 24 25 00.