2,7 miljárdda kruvnnu biire- ja guovllupolitihkkii

Ráđđehus árvala juolludit sullii 2,7 miljárdda kruvnnu  biire- ja guovllupolitihkkii jagi 2013.  Jagi 2005 rájes lea ruksesruoná ráđđehus juolludan sullii 20 miljárdda kruvnnu biire- ja guovlluovdánahttimii.

- Ráđđehus investere boahtteáigái miehtá riikka, ii dušše guovddáš báikkiin.  Soria-Moria-julggáštusas  mii lohpideimmet vuoruhit boaittobealeguovlluid ja juohke bušeahttajagi leat mii doallan lohpádusa, cealká gielda- ja guovloministtar Liv Signe Navarsete. Midjiide lea dát árvoválljemuš.  Biire- ja guovllupolitihka bokte mii váldit atnui buot resurssaid riikkas, mii de váikkuha árvoráhkadeapmái, bargosajiide ja čálgui doppe gos olbmot ásset.

Fylkkagielddat hálddašit 2,11 miljárdda kruvnnu, dahje badjelaš 79 proseantta ruđain mat leat erenoamážit várrejuvvon biire- ja guovllupolitihkkii. Bargoaddidivat buhtadusruđat leat dasa rehkenastojuvvon mielde.  

Fylkkagielddaid jagi 2011 raporttat čájehit ahte bealli ruđain juolluduvvojedje ealáhusovddideapmái, erenoamážit viidáset ovddidit ásahuvvon fitnodagaid. Dasto lágidit siskkáldas struktuvrra ja geasuheaddji báikegottiid.  

- Fylkkagielddat barget dehálaš barggu juksan dihtii biire- ja guovllupolitihkalaš našunála ulbmiliid, dadjá stáhtaráđđi Navarsete.

Stáhtabušeahta 2013 doaibmabijut:

Ealáhusovdánahttin ja ealáhushutkkus

• Ealáhusguovddášprográmma: Ráđđehus árvala ahte Gielda- ja guovlodepartemeanta juolluda 43 miljovnna kruvnnu 2013:s ealáhusguovddášprográmmii maid SIVA lea álggahan, 3 miljovnna eanet go jagi 2012. Prográmma áigumuš lea ovdánahttit báikegottiin ođđa máhttovuođustuvvon bargosajiid.
  
  
• Inkubašuvdna: SIVA lea jagi 2002 rájes ovddidan máŋggalágan inkubáhtorprográmmaid iešguđetlágan ođđa ealáhusvuolggaheddjiid várás. Jagis 2012 ráhkaduvvui oktasaš prográmma mii gohčoduvvo Inkubašuvdna.  Ráđđehus árvala ahte Gielda- ja guovlodepartemeanta juolluda 35 miljovnna kruvnnu prográmmii jagi 2013, 5,7 miljovnna kruvnnu eanet go jagi 2012. 
  
  
• VRI-prográmma ja Dutkanvuoruheapmi davvin: VRI- Guovlulaš DuO ja innovašuvnna váikkuhanprográmma- lea Dutkanráđi guovlulaš innovašuvnna áŋgiruššan.  Prográmma galgá veahkehit ovdánahttit ovttasdoaibmama fitnodagaid, dutkanbirrasiid ja almmolaš aktevrraid gaskka iešguđet guovlluin.  Dutkanvuoruheapmi davvin lea Dutkanráđi vuolggahan prográmma man ulbmilin lea nannet ja ovddidit dutkangealbbu Davvi-Norggas.  Ráđđehus árvala ahte Gielda- ja guovlodepartemeanta jagi 2013 juolluda 44,2 miljovnna kruvnnu VRI- prográmmii, ja 40 miljovnna kruvnnu Dutkanvuoruheapmái davvin.  Lassáneapmi lea de 5,2 ja 5 miljovnna jagi 2012 ektui.
  
  
• Orrunsajiid ásaheapmi boaittobealeguovlluin: Ráđđehus árvala juolludit badjelaš 20 miljovnna kruvnnu doarjjaortnegii mii galgá movttiidahttit hukset iešguđetlágan orrunsajiid gielddain gos leat smávva ja váilevaš orrunsajit.
  
  
• Norgga ealáhuseallin bioekonomalaš oktavuođas: Ráđđehus árvala ahte Gielda- ja guovlodepartemeanta juolluda jagi 2013:s 5 miljovnna kruvnnu Innovašuvdnii Norga ovddidit prográmma “Norgga ealahuseallin bioekonomalaš oktavuođas”. Dasto áigu Innovašuvdna Norga geavahit ovddit jagiid ruđaid nannet dán áŋgiruššama. Ulbmil lea earret eará geavahit eanet vejolašvuođaid maiguin sáhttá diinet.  Dát sáhttá leat hutkat ođasmahtti molssaeavttuid petrolea sadjái maid lea vejolaš geavahit ollu industriijabuktagiin.

Geasuheaddji báikegottit ja buorit bálvalusat

• Ássanmiella: Ráđđehus árvala juolludit 35 miljovnna kruvnnu doarjjaortnegii Bolyst. Prográmma galgá doarjut báikkálaš ja guovlulaš ovddidanprošeavttaid, mat ovddidit ássanmiela miehtá riikka, ja gávdnat ođđa vugiid ja máhtu movt buoridit ássanmiela.

 

• Báikkálaš servodatovddideapmi gielddain (LUK): Ráđđehus árvala juolludit 30 miljovnna kruvnnu dán doaibmabidjui jagi 2013. Áŋgiruššandoaibma, maid fylkkagielddat galget bidjat johtui, galgá veahkehit gielddaid plánet, searaid čohkket, ovttasbargat ja čađahit ovddidandoaimmaid, ja dán láhkai doaibmat geasuheaddji báikegottiid váikkuheaddjin. 
  
  
• MERKUR-prográmma ja ovddidan- ja investerendoarjja giliid gávppiide: Jahkái 2013 lea vuoruhuvvon 41,7 miljovnna kruvnnu dáid doaimmaide.  Oassi ruđain galgá geavahuvvot gávdnat vugiid movt borramušgávppiid nannet dehálaš guovddáš bálvalusfáluheaddjin ja sosiála arenan gili ássiide. Departemeanta áigu ođasmahttit ja nannet giligávppiid ja veahkehit vai sii sáhttet vuovdit boaldámuša mohtorvuojániidda.  Giligávppit leat dehálaš bálvalusfáluheaddjit smávva gilážiin.

Gielda- ja guovlodepartemeantta preassatelefovdna: 22 24 25 00.