6,8 miljárdda kruvnnu lassáneapmi gielddasuorgái

- Jagi 2013 hálddašit gielddat badjel 400 miljárdda kruvnnu.  Dáid ruđain lea 300 miljárdda kruvnna friijadietnasat.  Dát galgá ássiide addit ain eanet ja buoret bálvalusaid ovddasguvlui, cealká stáhtaráđđi Liv Signe Navarsete.

Ráđđehus árvala ahte gielddat galget oažžut 6,8 miljárdda kruvnnu duohta dienaslassáneami jagis 2013.  Vihtta miljárdda leat friijadietnasat.  Friijadietnasiid lassáneapmi galgá earret eará gokčat daid lassigoluid maid gielddat ožžot go olmmošlohku lassána. 

-Ráđđehusas lea stuorra luohttámuš gielddaide. Danne ožžot sii badjel vihtta miljárdda kruvnnu eanet friijadietnasa jagi 2013.  Seammás ii leat daddjon ahte Norggas álo manná nu bures go dál dahká. Eahpesihkkarvuohta máilmmiekonomiija ja Euroavádaga ektui ii leat šaddan unnit.  Danne fertejit gielddaid ássit maid ráhkkanit dasa ahte sáhttet boahtit heajut áiggit, dadjá Navarsete.

Dat lea vuosttas geardde ahte gielddaid dietnasat leat badjel 400 miljárdda kruvnnu.

- Dan rájes go ruksesruoná ráđđehus stivregođii, de lea báikkálaš čálgu leamaš okta dain deháleamos vuoruhansurggiin. Mii bisseheimmet heajosáiggiid maid gielddat guhká vásihedje. Dál leat ge ožžon áigái buori servodatovdáneami.  Jahkeviissaid leat mii vuoruhan eanet oahpaheddjiid, buohccedivššáriid ja earáid geat addet buriid čálgofálaldagaid juohke beaivvi, lohká Navarsete.

Ráđđehus láhčá dilálašvuođaid dasa ahte gielddalaš bálvalussuorggit nannejuvvojit erenoamážit.  Lassin friijadietnasiid lasáhusain ráđđehus árvala lasihit juolludemiid earret eará.

• Nominála bajibušmáksu mánáidgárdesaji ovddas jotkojuvvo
• Bajidit uhcimusdoarjaga mánáidgárddiide mat eai gula gielddaide
• Gielddalaš mánáidsuodjalus
• Skuvlaastoáiggiortnega kulturskuvlafálaldagat
• Válljenfágat nuoraidskuvllas
• Reantobuhtadanortnet mii geavahuvvo skuvllaid ja vuojadanáldásiid hukset ja divodit
• Beaivefálaldat demeanta olbmuid várás
• Investerendoarjja buohcceviessosajiide ja fuolahusviesuide
• Mánáid sihkkarastit skuvlabussiin
• Bálkkašanortnet buoridit kollektiivajohtolaga ja unnidit biilavuodjima gávpogiin
• Reantobuhtadanortnet fylkkaid fievrridandoaimmaide (geainnuid ja kollektiivajohtolaga investeremat)

Bienalaš dieđuid dáid vuoruhemiid birra gávnnat iešguđet fágadepartemeanttaid bušeahtain.