Dieđiha garra dienaslassáneami suohkaniidda

Ráđđehus dieđiha ahte friddja dietnasat suohkaniidda lassánit garrasit boahtte jahkái. – Dat mearkkaša eanet ja buoret bálvalusaid ássiide, dadjá gielda- ja guovloministtar Liv Signe Navarsete.

Ráđđehus áigumuš lea 2013:s lasihit oppalaš dietnasiid suohkanlaš suorgái gaskal 5,25 ja 6 miljárdda ruvnnuin.

- Oppalaš lassáneamis leat váile 5 miljárdda ruvdno friddja dietnasat. Dat láhče vejolašvuođa suohkaniidda joatkit huksemis mánáidgárddiid, skuvllaid, buhcciidruovttuid ja fuolahanviesuid oppa riikkas, dadjá Navarsete.

Lassáneapmi boahtte jahkái lea lassin daid lassánemiide maid suohkanat juo leat ožžon dán jahkái.

- Suohkansuorgi nannejuvvo juo dán jagi. Ođđa meroštallamat čájehit ahte vearrodietnasat jagi 2012:s lassánit 2,3 miljárdda ruvnnuin. Dienaslassáneapmi lagabui 5 miljárdda ruvnno eanet friddja dietnasiin jagi 2013:s boahtá velá lassin vearrodietnasiidda mat 2012 juo lassánedje. Danin sáhttá vuordit buori suohkanlaš bálvalusaid ovddasguvlui, lohka Navarsete.

Olmmošlogu stuorra lassáneapmi dagaha lea stuorit dárbu suohkanlaš bálvalusaide.

- Go olmmošlohku lassána, de dat gáibida ahte suohkanat viiddidit bálvalusaideaset vel eanet. Danin friddja dietnasiid lassáneami árvvoštallat dan ektui ahte suohkansuorggi golut lassánit olmmošlogu lassáneami dihte, lohká Navarsete. – Muhto ráđđehusa evttohusain de suohkanat ožžot buoret doaibmavejolašvuođaid doaibmat olmmošlogu lassáneami ektui.

Vaikko dietnasat garrasit lassánit, de ekonomalaš friddjavuohta rievddada nuppi suohkanis nubbái.

- Iešguđege suohkaniid ássiin leat iešguđetlágan dárbbut. Danin lea áibbas mearrideaddjin ahte dienaslassáneapmi boahtá friddja dietnasiid bakte. Dat dagaha suohkaniidda friddjavuođa heivehit bálvalusaideaset dan suorggis mas iežaset ássit daid eanemusat dárbbašit. Dát lea buot beaktileamos ruhtageavahanvuohki, lohká Navarsete.

Stáhtaráđđi eanemusat deattuha dan ahte suohkanat ieža bures dikšot iežaset ekonomiija.

- Buorre suohkan pláne iežas boahtteáiggi. Suohkan árrat juo pláne movt galgá dustet olmmošlogu čoahkádusa rievdadusaid. Dát gáibida buori ekonomiija hálddašeami ja buori ovttasbarggu politihkkariid ja hálddahusa gaskas. Guorahallan čájeha eanas olbmot leat duhtavaččat bálvalusain maid ožžot suohkanis. Dat mearkkaša ahte suohkana barget bures, dadjá Navarsete.

• Suohkanproposišuvdna 2013
• Muddejuvvon dietnasat juohke suohkanis (Excel)

Gielda- ja guovlodepartemeanta preassatelefovdna: 22 24 25 00