Huksensuorggi álkkásmahttin ja gelbbolašvuođalokten

- Ráđđehus áigu láhčit dilálašvuođaid dasa ahte álkkásmahttit ja beavttálmahttit huksenáššiid meannudemiid. Mii fertet sihkkarastit ahte das maid mii hukset lea buorre kvalitehta ja ahte gelbbolašvuohta ealáhusas lea buorre, cealká gielda- ja guovloministtar Liv Signe Navarsete.

Giđđat 2012 ovddideimmet vuosttas huksenpolitihkalaš dieđáhusa. Huksendieđáhusas “Buorit viesut buorre servodahkii” biddjojuvvo ráđđehusa bealis fuomášupmi vuosttažettiin daid  guovlluide gos rievdadusat dahje ođđa, áigeguovdilis huksenpolitihkka lea čađahuvvon.   

- Mii fertet sihkkarastit ahte olbmot investerejit boahtteáiggi heivehuvvon viesuid, mat leat dearvvašlaččat, birasseasti ja mat buohkaide leat fidnemis, oaivvilda Navarsete.

Ealáhusas lea dárbu gelbbolašvuođaloktemii juksan dihtii  huksenpolitihkalaš ulbmiliid. Ráđđehus árvala bovdet huksensuorggi viiddis gelbbolašvuođaloktenovttasbargui prošeavtta Huksen21 bokte. Huksen21 galgá vuoruhit DuO ja innovašuvnna rájes gitta gelbbolašvuođaovddideami rádjai juohke áidna huksensajis. Máhttu ja vásáhusaid gaskkusteapmi lea maid guovddáš doaibma. Huksenkvalitehta direktoráhtas galgá leat beaivválaš ovddasvástádus.

Huksenkvalitehta direktoráhtta galgá maid guorahallat livčče go ByggNett vejolaš neahttabáikin huksensuorgái, “Altinn” sullasaš. Guorahallan galgá earret eará geavahuvvot vuođđun ásahit ollislaš elektronalaš áššemeannudanvuogádaga gielddaide, neahttabáikki ByggSøk ovddidit ain eanet, ja geavahit huksendiehtojuohkinmodeallaid ja huksendokumeanttaid registara.

Ráđđehus árvala lasihit Huksenkvalitehta direktoráhta doarjjaortnegiid 20 miljovnna kruvnnuin vai lea vejolaš čađahit dáid doaibmabijuid jagi 2013.

Gielda- ja guovlodepartemeantta preassatelefovdna: 22 24 25 00.