Ođđa investerendoarjja lea dál sajis sihkkarastit boaldámuša (bensiinna ja diesela) boaittobealguovlluin

Guhkesgaskkat guovlluide lea mávssolaš ahte boaldámuš lea fidnemis. Ráđđehus lea danne várren badjel 21 miljovnna kruvnnu buoridit  boaldámušdili boaittobealguovlluin. Dát ruđat galget dál almmuhuvvot, ja guoskevaččat sáhttet ohcat investerendoarjaga.

- Dát doaibmabidju lea dehálaš oassi min barggus ovddidit buriid bálvalusaid boaittobealguovlluin, cealká gielda- ja guovloministtar Liv Signe Navarsete. Investerendoarjja galgá veahkkin hukset ja ođasmahttit dálá boaldámušrusttegiid ja ásahit ođđa, mobiila rusttegiid. Mii leat ožžon diehtit ahte olu báikegottiin leat stuora hástalusat doalahit doarvái boaldámuša.

Ođđa investerendoarjaga hálddaša MERKUR-prográmma. Dát lea gealbo- ja ovddidanprográmma boaittobealeguovlluid borramušgávppiid várás. Vásáhusat MERKUR áŋgiruššamis leat buorit. Gávppit mat leat MERKUR prográmmas mielde rahčet muhtumin, muhto birgejit ain juo buorebut go eará boaittobealegávppit. Dákkár buorit bohtosat leat dagahan ahte MERKUR dál viiddida iežas doaimma.

- Mun dieđán ahte lagašgávppit leat dehálaččat olu báikegottiide. Gávpi čoahkkananbáikin ja bálvalusaid lágideaddjin smávva gilážiin lea hirbmat mávssolaš ja lea maid geasuheaddjin olles gillái, dadjala gielda- ja guovloministtar. Danne lea dehálaš ahte mun, gii vástidan boaittobeliid- ja guovlopolitihka, lean mielde doarjumin dákkár “bálvalusguovddážiid” unnimus báikegottiin Norggas.

Buot dieđuid ođđa ortnega birra gávnnat MERKUR-prográmma ruovttusiidduin, doppe gávnnat dieđuid geat sáhttet ohcat, ja makkár eavttut gustojit doarjjajuolludussii. Doppe gávnnat maid dieđuid geainna sáhtát váldit oktavuođa jos ležžet gažaldagat ortnegii.

Gielda- ja guovlodepartemeantta preassatelefovdna: 22 24 25 00