Stáhta ja gielddat – stivrejupmi ja ovttasdoaibman: - Gielddat dárbbašit friddjavuođa

- Ráđđehus háliida gielddaid ja fylkkagielddaid mainna lea váikkuhanváldi. Buorit ja beaktilis čálgobálvalusat ja nana báikkálaš servodagat gáibidit gievrras gielddasuorggi mas lea váikkuhanvejolašvuođat, cealká gielda- ja guovloministtar Liv Signe Navarsete.

Son ovddidii bearjadaga prinsihppadieđáhusa stáhta ja fylkkagielddaid gaskavuođaid birra. Dieđáhusas mearriduvvojit ekonomalaš ja juridihkalaš rámmastivrejumi prinsihpat gielddaid ektui.

- Molssaeaktu lea stáhtalaš bienalaš stivrejupmi, dadjá Navarsete. Son oaivvilda ahte muhtun áŋgiruššamat ja politihkalaš fámut dolvot boasttu guvlui – eanet stáhtalaš stivrejumi guvlui.

Dieđáhusas nannejuvvo prinsihppa ahte buot gielddain beroškeahttá sturrodagas galget leat seammá doaimmat.

- Dát bidjá vuođu dásseárvosaš bálvalusaide mat báikkálaččat leat heivehuvvon buot ássiid várás gos dal de orošit riikkas, lohká Navarsete.

- Ráđđehus ásaha vuođu nana báikkálaš álbmotstivrejumi viidáset ovdánahttimii. Buorit čálgofálaldagat ásahuvvojit buori ovttasdoaibmamiin gaskal gievrras gielddasuorggi ja stáhta mii diehtá maid áigu,muhto diktá gielddaid iežaset gávdnat buriid báikkálaš čovdosiid, dadjala Navarsete.

- Erohusat gielddaid ja stáhta gaskkas leat stuorrát. Seammá sáhttet maiddái hástalusat. Danne lea dehálaš ahte báikkálaš álbmotválljejuvvon áirasat mearridit dehálaš áššiid mat gusket ovttaskas ássiide. Sii dovdet báikkálaš dárbbuid buoremusat. Dán dieđáhusa prinsihpat galget leat vuođđun buriid čálgofálaldagaide ja buori servodatovdáneapmái miehtá riikka guhkit áiggi vuollái, cealká Navarsete.

Son oaivvilda ahte dieđáhusa deháleamos doaibmabijut juohkásit golmma sadjái:

• Go mii ráhkadat ođđa lágaid, de galgat mii čielgasit árvvoštallat našunála beroštumiid ja gielddaid váikkuhanfriddjavuođa bohtosiid. Mii galgat maid sihkkarastit gielddaid oassálastinvejolašvuođaid dákkár proseassain.
• Go mii árvvoštallat ođđa, oktagaslaš rivttiid, de galgat mii álo árvvoštallat čovdosiid mat dahket báikkálaš heivehemiid vejolažžan. Molssaeaktun dákkár oktagaslaš rivttiide, galgá stáhta árvvoštallat gielddaid geatnegasvuođaid fállat bálvalusaid mainna lea seamma ávki. Dát addá stuorit vejolašvuođaid. Ráđđehus ii áiggo ovddidit ođđa árvalusaid oktagaslaš plánii ovdal go mii leat čađahan vuđolaš láhka guorahallama dán suorggis.
• Mii galgat sihkkarastit gielddaide ávkkálaš ja ohcaluvvon bagadusa. Stáhta ii galgga gielddaid bágget raporteret jos dat ii doaimma. Mii gulahat maiddai guorahallama direktoráhtain diđoštan dihtii movt dát lea váikkuhan gielddaid doaibmafriddjavuhtii.

 
- Mii dárbbašat našunála stivrejumi dehálaš surggiin, muhto stivrejupmi galgá leat vuođuštuvvon ja ulbmillaš.  Mun jáhkán ahte gulahallan ja ovttasdoaibman doaibmabijuid ektui dávjjimusat buktet buoremus bohtosiid ja eai ge nana stivrenneavvut, lohká Navarsete.

• Stuoradiggedieđáhus “Stat og kommune – styring og samspel”
• Neahtta-tv preassakonfereanssas stuoradiggedieđáhusa birra guovvamánu, "Pressekonferanse om stortingsmelding om stat-kommune"
• Hashtag:#statkommune

Gielda- ja guovlodepartemeantta preassatelefovdna: 22 24 25 00