900 000 kr. prošektii ”Ođđa áŋgiruššan” Kárášjogas

Dán jagi bohte olles 130 ohcama Ássanhálu nannema olis. Lei miellagiddevaš oaidnit mas báikkálaš ja regiovnnalaš lágideaddjit beroštit nu ahte báikegoddi šaddá geasuheaddjin. Máŋga jagi leat gielddat erenoamážit beroštan integreremis ja sisafárremis. Dán jagi mii várriimet 55 miljovnna kruvnno ássanhálloprošektii. Das juolludit 900 kr ”Ođđa áŋgiruššamii” Kárášjogas.

- Ráđđehus dáhttu ahte buohkat Norggas galget oažžut ássat doppe gos háliidit. Ássanhállonannemis juolludit ruđaid ovddidandoaimmaide mat dahket báikegotti geasuheaddjin. Mii geahččat erenoamážit dakkár prošeavttaid mat heiveše dađis maiddái eará guovlluide riikkas. Ohcamat čájehit ahte lea stuora beroštupmi miehtá riika, dadjá gielda- ja guovloministtar Liv Signe Navarsete.

Máŋggalágan ohcamat leat boahtán, sihke fáttá ja geográfiija dáfus.  Gielda- ja guovlodepartemeanta lea ohcamiid válljemis erenoamážit deattuhan kvalitehta, vuođu ja ovttasbarggu. Fylkkagielddat leat gieđahallan ruhtaohcamiid. Guovloguovddážis lea dehálaš bargu prošeavtta gaskkustit ja oidnosii buktit. 

- Ássanhállodoaibma lea njealját ja maŋemus jagis. Golbma vuosttaš jagi ožžo 94 prošeavtta birrasiid 124 miljon kruvnno. Mun illudan dainna maid mii leat olahan miellagiddevaš ovddidanbargguiguin báikkálaččat, dadjá stáhtaráđđi. Prošeavttat leat buktán movtta ja áŋgiruššama báikegottiide. Dán jagi ožžot 49 prošeavtta oktiibuot 55 miljon kruvnno. Sávan ahte prošeavttat buktet buriid bohtosiid gielddaide ja báikegottiide.

Ođđa áŋgiruššan sámi gielddas Kárášjogas, 900 000 kr. Kárášjoga ealáhussearvái.
Ealáhussearvi gielddas áigu leat njunnošis jorgalahttit dan maid ieža gohčodit negatiiva ovdáneapmin gielddas,  earet eará leat demográfalaš hástalusat. Searvi dáhttu nannet gieldda ealáhusovdáneami,  ja deattuhit doaimmaid mat ovddidit buori beaggima, eanet ássanhálu ja ássanilu. Sii leat barggu vuođđudan gieldda strategalaš ealáhusplánii.  Gielda ja ealáhussearvi áigot oidnosii buktit fálaldagaid mat gielddas leat, ja nu nannet báikkálaš ealáhusaid. Dát bajilgovva galgá leat vuođđun ođđa doaimmaide maiguin sáhttá ovdánahttit fálaldagaid, bálvalusaid ja ássanhálu gieldda olbmuide buorrin.

- Dát prošeakta lea ožžon doarjaga ja dat sáhttá láidestit eará báikkálaš servodagaid miehtá Norgga, ja mun illudan bohtosiidda maid dát buktá, dadjá Gielda- ja guovloministtar Liv Signe Navarsete.