Eanet ealáhusguvllot gealbohuksen

Gielda- ja guovlodepartemeanta nanne ráđđehusa barggu ahte vuoruhit ovttasbarggu ealáhusaid ja oahppoásahusaid gaskka.

Gealbonávccalaš ealáhuseallima ovdánahttinbarggu oktavuođas vuoruha Gielda- ja guovlodepartemeanta  20 miljovnna kruvnnu jagi 2013 ealáhusguvllot gealbohuksemii.

- Mii háliidat vuoruhit prošeavttaid mat buoridit oahppofálaldagaid ja gelbbolašvuođa fitnodagain, cealká gielda- ja guovloministtar Liv Signe Navarsete.

Dán fálaldaga bokte sáhttet allaskuvllat ja máhttoásahusat fállat gelbbolaš bargofámu mat leat heivehuvvon guovlulaš ealáhusaid dárbbuide. Ulbmil lea nannet ealáhusbirrasiid ja doaimmaid, erenoamáš doaresbealeguovlluin Norggas, ja fálaldat galgá dálá ortnegiidda lassin. Ruđat galget geavahuvvot ovddidit bures heivehuvvon, bargoguvllot ja ealáhusguvllot fálaldagaid fágaskuvllain, alit oahpahusas ja/dahje lassi- ja joatkkaoahpahusas.   

Dát fálaldat lea earret eará Gelbbolašvuođabargosajiid (NOU 2011:3 Kompetansearbeidsplasser – drivkraft for vekst i hele landet) čuovvoleapmi. Lávdegoddi čujuhii ahte gelbbolašvuođabargosajiid ektui Norggas ledje stuora geográfalaš erohusat, ja danne oinnii duohta dárbbu loktet gelbbolašvuođa dakkár guovlluin mat leat olggobeale Oslo ja stuora gávpogiid.

Innovašuvdna Norga áigu ovttasráđiid fylkkagielddaiguin, SIVA:n, Norgga dutkanráđiin ja ealáhuseallimiin ráhkadit sisdoalu  ealáhusguvllot gealbohuksemii. Almmuheapmi dáhpáhuvvá dán giđa mielde.

- Gánnáhahtti ja gilvalannávccalaš norgga ealáhuseallin lea sorjavaš das ahte olles bargoveagas lea nanu gelbbolašvuohta.  Dat váikkuha árvobuvttadeapmái ja addá vuođu ássanbáikkiid ovdáneapmái  miehtá riikka, oaivvilda gielda- ja guovloministtar.