Lagat ovttasbargu gávpogiid ja gávpotosiid gaskka

Guovlulaš ovdáneapmi lea sorjavaš das ahte ovttasbargu doaibmá bures smávva ja gaskasturrosaš gávpogiid ja lagas gávpotosiid gaskka.

Mii vásihat dál ahte ealáhuseallin, bargoeallin ja ássiidválddahallan sakka nuppástuvvá olles riikkas.  Dat váikkuha ovdáneapmái ja lea boahttevaš ássandilálašvuhtii mearrideaddjin Norggas.  

Bargomárkana ja ealáhusovdáneami dáfus leat smávva ja gaskasturrosaš gávpogat dehálaččat iežaset lagas gávpotosiide. Máhttovuođuštuvvon árvobuvttadeapmi ja bures doaibmi bargomárkanat ráhkadit vuođu boahttevaš buolvvaid čálgoservodahkii.

- Olu máilmmiviidosaš ja olgoriikkavuovdin gávppiid gávdnat mii smávva gávpotguovlluin, cealká gielda- ja guovloministtar Liv Signe Navarsete.

Seammás ohcaluvvo gelbbolašvuohta miehtá riikka, maiddái smávva ja gaskasturrosaš gávpogiin. Okta vuohki mo ealáhuseallimii háhkat bargofámu ja seammás juohkit bargofámu stuorebuš gávpotosiide, lea ahte oaččuhit áigái buoret ovttasdoaibmama gávpogiid ja lagas guovlluid gaskka.

Gielda- ja guovlodepartemeanta lea vuoruhan 7,5 miljovnna kruvnnu jagi 2013 bušeahtas ovdánahttinprográmmii nannet ovdáneami dákkár gávpogiin. Ná háliida departemeanta váikkuhit positiiva ovdáneapmái ovttasbarggu bokte gaskal smávva ja gaskasturrosaš gávpogiid ja gávpotosiid. Dát guoská báikkiide min riikkas gos orrot gaskal 5000 ja 50 000 ássi. Báikkit leat iešguđetláganat, sihke sturrodaga, ealáhusstruktuvrra, gealbobargosajiid ja oahppoásahusaid ektui. 

- Prográmma ulbmil lea ahte ealáhuseallin guovddáš gávpogiin ja gávpotosiin galggašii buorebut ovttas doaibmat,  vai eanet guovllut buorebut besset searvat ealáhuseallimii, dadjá stáhtaráđđi.

Guoskevaš gávpogat, gielddat, fylkkagielddat ja váikkuhangaskaomiid hálddašeaddjit galget ovttas ovddidit prográmma. Vuosttas bargun šaddá háhkat máhtu das movt gávpogat váikkuhit ealáhusovdáneapmái ja bargomárkaniidda iežaset gávpotosiin, ja dát galget de addit vuođu iešguđet báikái heivehuvvon doaibmabijuide ja strategiijaide.