Logi miljovnna ođđa fidnohutkanportálii

Ođđa neahttabáikki bokte galgá easkkaálgi fidnohutkkiide šaddat álkibun gávdnat dieđuid ja oažžut vástádusaid johtilit.

- Lea ollu maid ferte jurddašit go áigu ásahit iežas fitnodaga, dadjá gielda- ja guovloministtar Liv Signe Navarsete.

- Ulbmil fidnohutkanportálain lea ahte áigeguovdilis dieđuid galgá álki gávdnat, ja ahte fidnohutkit ožžot johtilis vástádusaid. Bálvalusas galget gávdnot sihke Innovašuvnna Norga ortnegat ja eará  dieđut  mat ođđahutkiide leat ávkkálaččat ásaheami ovdal, ásahettiin ja maŋŋil, cealká Navarsete.

Ođđahutkanráđđi árvalii earret eará ásahit interneahttaportála gos buot ođđahutkan guoskevaš dieđut leat čohkkejuvvon.  Gielda- ja guovloministtar dat leai gii čakčat 2011 bivddii nuorra fidnohutkiid árvalit doaibmabijuid álkkásmahttit ođđaálggaheddjiid árgabeaivvi. Ráđđi gárvvistii raporttastis geassemánus 2012 ja okta árvalus leai ahte čohkket ávkkálaš dieđuid.

Gielda- ja guovlodepartemeanta lea jagi 2013 stáhtabušeahtas juolludan 10 miljovnna dán doibmii. Bálvalus lea vuordimis geavahan láhkai geassái.

Innovašuvdna Norga galgá ovddidit dán ođđa, neahttavuđot bálvalusa lagaš ovttasbargguin Altinn:n ja eará áigeguovdilis bargoguimmiiguin.

Áŋggirdeami ferte maid árvvoštallat eará doaibmabijuid ektui mat leat ásahuvvon ođđaálggaheddjiid várás. Gielda- ja guovlodepartemeanta lea nannen ja ođasmahttán álggahandoarjaga, rávvenortnegiid nuoraide, ealáhusgilvvagárddiid ja bagadallamiid maid fidnohutkit sáhttet ávkkástallat.

Gielda- ja guovlodepartemeantta preassatelefovdna: 22 24 25 00.