Váldde atnui olles Norgga!

Norga lea earáláganriika Eurohpás. Mii leat nanu ekonomalaš ovdáneami nagodan ovttastahttit lihkostuvvan birgenlágiin olles riikkas uhcán geográfalaš erohusaiguin. Mis lea buorre árvobuvttadeapmi danne go mii nagodat váldit atnui olles Norgga!

- Dát ii boađe iešalddis, muhto lea boađus guhkit áiggi doaimmalaš báikegodde- ja guovlopolitihkalaš barggus. Dat lea lihkostuvvama historjá, cealká gielda- ja guovloministtar Liv Signe Navarsete.

Ahte olbmot ásset miehtá riikka lea min riikka dovdomearka. Bieđgguid ássan lea mielde váikkuheamen Norgga identitehtii ja bivnnutvuhtii. Doaresbealeguovlluin Norggas lea dál buoremus olmmošlogu lassáneapmi 30 jahkái. Buot fylkkain lea olmmošlohku  lassánan maŋimuš jagiid, ja 107 gielddas lassánii olmmošlohku eanet jagi 2012 go 2006:s.

Ráđđehus áigu ain fievrridit aktiivvalaš ja ulbmillaš báikegodde- ja guovlopolitihka. Dás lea sáhka nana gieldaekonomiijas sihkkarastin dihte buriid čálgoortnegiid. Mii áigut vuoruhit johtolatsuorggi, sihke kollektiivajohtolaga, buoret geainnuid, tuneallaid, ruovdemáđijaid ja govdafierpmádaga sihkkarastin dihte buoret vejolašvuođaid buohkaide. Dás lea sáhka árvobuvttadeamis ja ealáhusovdáneamis olles riikkas.

Doaibmaguovlu galgá leat geasuheaddji ássamii ja ealáhusdoaimmaide davvin. Heivehuvvon bargoaddidivat sihkkarastá ealáhusdoaimmaide buoret vejolašvuođaid, ja dakkár guovlluin gos leat guhkes gaskkat ja bargomárkan uhci.

Seammás ferte politihkka ođasmahttojuvvot. Servodathástalusat leat dál earáláganat go moadde jagi dás ovdal. Sivvan dasa ahte stuorit gávpogat sturrot ja ahtanuššet leat sisafárremat ja alla riegádahttinlogut, ja unnán fárremat riikka siste. Buot gielddat ožžot ođđa ássiid. Searvadahttin ja viessohuksemat leat dehálaš temát buot riikkaosiin.

Bargguhisvuohta lea vuollin ja bargofápmu ohcaluvvo eanet go ovdal. Gelbbolašvuođabargosajit leat geográfalaččat eahpegovttolaččat juogaduvvon, ja rivttes gealbu šaddá dađistaga deháleappot,  sihke priváhta ja almmolaš suorggis. Báikkálaš, guovlulaš ja našunála eiseválddiid politihka ja áŋgiruššamiid ferte de rievdadit.

- Gielddat ja báikkálaš servodagat fertejit baicce addit vejolašvuođaid  sidjiide geat bohtet ovdal go bidjat fuomášumi sidjiide geat mannet.  Áŋggirdeaddjit ja báikkálaš servodatberoštupmi sáhttet  nuppástuhttit olu báikkálašservodagaid. Ráđđehus doarju báikkálaš rahčamušaid ovddidit bivnnuhis báikegottiid, dadjá stáhtaráđđi.

Guovlulaš hástalusat ja guovlulaš vejolašvuođat gáibidit guovlulaš čovdosiid. Danne juolluda ráđđehus eanaš guovlulaš ovddidandoarjagiid fylkkagielddaide. Eanaš ruhta manná ásahit ođđa bargosajiid ja nuppástuhttindoaimmaid. Fylkkagielddat galget Innovašuvdna Norggain, SIVA:n ja Dutkanráđiin ovttas láhčit dilálašvuođaid buoret guovlulaš fitnodatovdáneapmái ja entreprenevrraide.

- Mii galgat láhčit dilálašvuođaid máhttovuđolaš ealáhusdoaimmaide. Ráđđehus áigu fuolahit ahte allaskuvllat ja eará oahppoásahusat ožžot vejolašvuođaid fállat gelbbolaš bargofámu mii lea heivehuvvon guovlulaš ealáhusdoaimmaide.  Ulbmil lea nu stuora árvobuvttadeapmi go vejolaš, lohká Navarsete.

Bargu lea čoavdda lihkustuvvamii, ovttaskas olbmui ja servodahkii. Mis lea alla árvobuvttadeapmi danne go mii nagodat geavahit olmmošlaš ja luondduvuđot resurssaid buvttadit árvvuid. Báikegodde- ja guovlopolitihkka lea riikii buoremussan. Váldde atnui olles Norgga!

Gielda- ja guovlodepartemeantta preassatelefovdna: 22 24 25 00.