Finnmárkku riddoguolástuslávdegoddi

Guolástus- ja riddoministtar ja sámediggeráđđi leaba otne čađahan ráđđádallamiid das mo čuovvolit Finnmárkku riddoguolástuslávdegotti árvalusaid ja soahpan evttohuvvon doaimmaid ektui.       

- Stáhtas lea geatnegasvuohta čađahit ráđđádallamiid dakkár áššiin mat leat erenoamáš dehálaččat sámiide ja sámi beroštumiide, ja dán áššis lea mus leamaš áigumuš juksat ovttamielalašvuođa Sámedikkiin, cealká guolástus- ja riddoministtar Lisbeth Berg-Hansen. 

 - Otne leat mii čađahan konstruktiivvalaš čoahkkima gos mii leat meannudan ja soahpan evttohuvvon doaimmaid. Mii leat maid seammá oaivilis ahte mis lea goabbat  lágan áddejupmi dasa ahte man ollu álbmotrievttálaš njuolggadusat gusket guolásteapmái, joatká guolástus- ja riddoministtar.

Viidáset proseassa lea ahte ráđđehus áigu ášši ovddidit Stuoradiggái maŋŋil go Sámediggi lea meannudan ášši.  Sámedikki oaidnu álbmotrievttálaš gažaldagaid birra galgá čalmmustahttojuvvot sierra mearkkašupmin dokumeanttas maid ráđđehus ovddida  Stuoradiggái.

Evttohuvvon doaimmat leat vuosttažettiin ahte galgá láhkasuodjaluvvon vuoigatvuohta nuvttá bivdit dorski, divssu ja sáiddi dábálaš bivdoneavvuiguin buohkaide geat ásset Finnmárkkus, Davvi-Romssas ja muđui eará gielddain Romssas ja Nordlánddas mat gullet Sámedikki doarjjaortnegiid doaibmaguvlui, earret muhtun guovllut Romssa gielddas, ja eaktun lea ahte guollebivdis galgá leat mearkaregistrerejuvvon fanas vuollel 11 mehtera ja ahte bivdi lea mielde guolástuslogus.

Áhperesursaláhkii boahtá dasto ođđa mearrádus ahte sámi guolásteapmi ja dan mearkkašupmi sámi báikegottiide galgá deattuhuvvot eriid juogadettiin. Lasihuvvo vel  3000 tonna liigeearri maid buohkat sáhttet juogadit doaibmaguovllus.  Dasto lea evttohuvvon ásahit vuotnabivdolávdegotti Finnmárkku, Romssa ja Nordlándda várás mii galgá doaibmat ráđđeaddin našunála eiseválddiide. Dasa lassin galgá ráhkaduvvot rámmašiehtadus gaskal Guolástus- ja riddodepartemeantta ja Sámedikki ráđđádallamiid birra.  Vuotnabivdolávdegotti bargoviidodat, ja lávdegotti cealkámušaid mearkkašupmi galgá dán oktavuođas árvvoštallojuvvot.

Vai guolásteddjiin galgá leat vejolašvuohta geavahit báikkálaš resurssaid, de evttohuvvo ásahit bivdogildosa siskkobealde vuotnalinjjáid fatnasiidda mat leat badjel 15 mehtera, muhto das galgá sáhttit spiehkastit.

Loahpas lea vel evttohuvvon ahte guollebivdinsajiid dohkkeheami gáibádusaid maid dál lea vejolaš ovddidit duopmostuoluid ovdii, dál galgá sáhttit ovddidit Finnmárkkukommišuvdnii.  Jos dát šaddá áigeguovdilis áššin guovlluin olggobealde Finnmárkku, de dan ferte árvvoštallat Sámevuoigatvuođalávdegotti II čuovvoleames.