16 miljovdna lassi juolludeapmi BarentsWatch:ii

– Diehtojuohkinvuogádat BarentsWatch lea davviguovlludieđáhusa dehálaš ja konkrehta čuovvoleapmi. Ulbmil lea viidáset ovdánahttit reaiddu man bakte oažžut oppalaš dieđuid das mii dáhpáhuvvá min viiddis áhpeguovlluin, dadjá guolástus- ja riddoministtar Lisbeth Berg-Hansen.

Riddodoaimmahat lea ožžon bargun ásahit BarentsWatch, Norgga áhpe- ja riddoguovlluide dievaslaš diehtojuohkinvuogádat. Vuogádagas lea rabas oassi (diehtojuohkin-uskkádat) ja nubbi  giddejuvvon oassi (dieđuidlonohallama váste etáhtaide geain lea hálddašanovddasvástádus Norgga mearraguovlluin). Rabas vuogádaga vuosttaš gáhppálat almmuhuvvui 2012 miessemánu 39. beaivvi, ja lea álggahan hábmet bálvalusaid giddejuvvon oasis.

Lassáneaddji juolludeami árvalus dagaha vejolašvuođa ovdánahttit fierpmádaga mas lea ovddasvástádus mearrajohtolaga ektui. Dákkár fierpmádat lea áibbas dárbbašlaš etáhtaide go gaskaneaset galget lonohallat rašes ja hearkkes dieđuid. Oadjebas fierpmádat earret eará dagaha barggu beaktileabbon go galget fuomášit lobihis doaimmaid. Dákkár oadjebas neahtta vuosttaš gáhppálat sáhttá ásahuvvot 2013:s.

Riddodoaimmahat álggaha maiddái ovdánahttit dámppaide hápmaniidda boahtima dievaslaš hálddašanvuogádaga. Dán bálvalusa vuosttaš gáhppálat sáhttá leat gárvvisin ovdánahttojuvvon 2014:s. Dievaslaš hápmanii boahtima hálddašanvuogádat dárkkistit ja duođaštit dámppaid iežaset raporterema dakko bakte go goallostit oktii iešguđetlágan diehtogálduid. Dát dagaha álkibun fuomášit eahpedábálaš doaimmaid.