Dorskenálli Barentsábis garrasit lassánan

Áhpedutkit čujuhit ahte jagi 2013 šaddá buoremus dorskejahki obanassiige.

–Máŋgga jagi buori stivrejupmi, ja ovttas Ruoššan de mii leat nagodan eastadit lobihis bivddu Barentsábis, lea dat mii lea dagahan ahte mii fas leat nagodan cegget ovtta máilmmi stuorimus dorskenáliin. Áhpedutkiid earreráva mearkkaša stuorimus dorskeeari boahtte jahkái, ja nu stuorit doaimma ja árvoháhkama miehtá rittu, lohká guolástus- ja riddoministtar Lisbeth Berg-Hansen.

Riikkaidgaskasaš áhpedutkanráđđi (ICES) almmuhii odne, geassemánu 8. beaivvi, iežas rávvaga Barentsábi 2013 guolástaneriid birra. Dát dieđalaš rávvagat mearkkašit ahte Barentsábi oppalaš dorskeearri lassána ovddit jagis sullii 190 000 tonnas lagabui 1 miljovnna tonnii 2013:s.

Áhpedutkit einnostit ahte Barentsábis dál lea sullii 3,5 miljovnna tonna dorski. Lea Norga ja Ruošša mat ovttas hálddašit dán máddodaga, ja boahtte jagi loahpalaš bivdoeriid mearrida oktasaš Norgga-Ruošša guolástuskommišuvdna golggotmánus.

–Mis lea dál nu stuorra dorskenálli Barentsábis ahte 2013:s dagaha stuorimus dorskebivddu mii 40 jagis obanassiige leat deaividan.  Das leat stuorra oalgeváikkuhusat, dadjá Berg-Hansen, guhte maiddái muittuha ahte máddodagaid maiddái galgá hálddašit rievttes ládje čuovvovaš jagiid ovddasguvlui.

- Luondduviđá eavttut leat dál hui oiddolaččat Barentsábis, mii dagaha earenoamáš buori vuođu guolásteapmái davvin jus hálddašemiin lihkostuvvat ja hálddašit máddodaga ceavzilis ládje. Dál mii áigut ovttas joatkit ávkkástallat min valljodagaid dievaslaččat ja ceavzilis vuogi mielde, nu ahte mii máŋggaid jagiid ovddasguvlui sáhttit ávkkástallat nana máddodagaid, dadjá Berg-Hansen.

Loga eanet Barentsábi 2013 earrerávvagiid birra Áhpedutkaninstituhtas.