Nannet mearrajohtolaga ja ceavzilvuođa guolástus- ja áhpedoallohálddašeamis

Guolástus- ja riddodepartemeanta 2013 bušeahttaárvalusa gollorámma lea 4 929 miljovnna ruvnno. Dát mearkkaša 334,5 miljovnna ruvnno lassáneami 2012 dássejuvvon bušeahta ektui.

-Nannet mearrajohtolaga gilvalannávcca lea dehálaš vuoruhansuorgi Guolástus- ja áhpedoallodepartemeanta 2013 bušeahtaárvalusas, dadjá guolástus- ja riddoministtar Lisbeth Berg-Hansen. Ráđđehus vuoruha maiddái barggu ahte nannet Guolástusdirektoráhta áhpedoaluid bearráigeahču. Dasa lassin árvaluvvo álggahanjuolludeapmin ođđa dutkanfatnasa mii galgá jiekŋaguovlluin adnot ja gierdá jieŋaid. Fanas lea earret eará dehálaš davviguovlluid kártenbargui.

Nationála fievrridanplána – čuovvoleapmi riddosuorggis
Infrastruktuvrra nannen ja divatdási geahpideapmi buorida ja nanosmahttá gilvalancoavcci mearrafievrridansuorggis. Ráđđehus árvala danin lasihit oppalašjuolludeami Nationála fievrridanplána (NTP) čuovvoleapmái 141 miljovnna ruvnnuin riddosuorggis. 2013 bušeahtaárvalusain lea NTP njeallje jagi áigodat ollašuhttojuvvon.

Ráđđehus árvala lasihit juolludeami navigašuvdnarusttegiid áimmahuššamii 19,2 miljovnna ruvnnuin, doarjja suohkaniid guolástushápmaniid huksemiidda árvaluvvo lasihuvvot 21,5 miljovnna ruvnnuin, juolludeapmi diehtojuohkinvuogádahkii BarentsWatch:ii árvaluvvo lasihuvvot 16 miljovnna ruvnnuin, ja juolludeapmi riddohálddašeapmái, plána ja analiisa Riddodoaimmahaga ja Guolástus- ja riddodepartemeantas árvaluvvo lasihuvvot oktiibuot 17 miljovnna ruvnnuin. Juolludeapmi fatnasiidda lasihuvvo 9,4 miljovnna ruvnnuin Riddodoaimmahaga ođasmahttinplána čuovvoleami várás. Árvaluvvo maiddái 25 miljovnna ruvnno juolluduvvot dutkamii ja čielggademiide mearrafievrrideapmái ja ráđđehusa lagasfanasjohtolaga strategiija čuovvoleapmái. Ráđđehus árvala heaittihit riddodivada, mii mearkkaša ahte ealáhus dan olis seastá 32,9 miljovnna ruvnno.

BarentsWatch

Ráđđehus árvala juolludit 16 miljovnna ruvnno BarentsWatch:ii. BarentsWatch lea dievaslaš diehtojuohkinvuogádat Norgga áhpe- ja riddoguovlluid várás. Vuogádagas lea rabas oassi (diehtojuohkinuskkádat) ja giddejuvvon oassi (dieđuid lonohallama váste ossodagaid gaskas geain lea hálddašanovddasvástádus Norgga mearraguovlluin). Jagi 2013:s galgá earret eará ovdánahttojuvvot dorvvolaš fierpmádat daid ossodagaid váste mat gullet BarentsWatch giddejuvvon oassái. Galget maiddái álgit ovdánahttit fatnasiidda ollislaš gáddebissánanhálddašanásahusa, mii máŋggaid diehtogálduid ovttastahttima bakte sáhttet fuomášit eahpedábálaš doaimmaid.

Nannet áhpedoallobearráigeahču

Ráđđehus árvala lasihit juolludeami Guolástusdirektoráhttii 10 miljovnna ruvnnuin áhpedoallobearráigeahču nannema várás. Dát doaibmi riskavuođuštuvvon bearráigeahčču galgá nannejuvvot, earenoamážiid biohivvodaga dárkkistan ja gárgidan surggiin. Juolludeapmi galgá sihkkarastit ahte sáhttit ovdánahttit reaidduid maid bakte buorebut sáhttit buoridit biohivvodaga bearráigeahču. Ulbmil lea sihkkarastit ahte mearriduvvon gáržžideamit mat gullet buvttadeapmái ja birrasii eai rihkkojuvvo. Dehálaš oassi nannenbarggus lea maiddái ahte ovdánahttojuvvo elektrovnnalaš vuogádat dieđuid čohkkema várás. Guolástusdirektoráhtta galgá maiddái nannet áŋgiruššama ja eanet bargat rusttegiid bearráigeahčuin ja nu eastadit gárgidemiid. Dát guoská sihke rusttetteknihkkalaš ja doaibmateknihkkalaš riskabeliide. Bargguin čuovvolat Riikkadárkkástusa áhpedoallohálddahusa hálddašandárkkástusa, mas čujuhedje raššivuođaide ja váilivuođaide áhpedoallohálddahusa dárkkisteamis ja bearráigeahčus.

Ođđa jiekŋagierdi dutkanfanas

Nannemis polára- ja birasdutkama ja resursakártema davviguovlluin árvala ráđđehus hukset ođđa jiekŋagierdi dutkanfatnasa. Fanasprošeavtta ollislaš gollorámma 1,4 miljárdda ruvnno, ja 2013 bušeahtas árvaluvvo álgojuolludeapmin 75 miljovnna ruvnno. Fatnasa ruovttuhápman lea Romssas. Fatnasa deháleamos geavaheaddjit šaddet leat Norgga Polarinstituhtta, Romssa Universiteahta ja Mearradutkaninstituhtta. Mearradutkaninstituhtas lea ovddasvástádus jođihit huksenproseassa. Vuordámuš lea ahte fanas galgá gárvvistuvvot jagi 2015:s.