Guolástus- ja riddodepartemeanta oažžu ovddasvástádusa “BarentsWatch” ásaheames

Ráđđehus lea mearridan ahte Guolástus- ja riddodepartemeanta oažžu ovddasvástádusa ásaheames ođđa  dievaslaš vákšun- ja diehtojuohkinvuogádaga davvi áhpe- ja riddoguovlluide (”BarentsWatch”).  Barggu galgá Riddodoaimmahat jođihit. Stáhta Kártadoaimmahat, Meteorologalaš instituhtta ja moanat relevánta fágabirrasat gessojit mielde bargui.

BarentsWatch galgá plána mielde ovdánahttojuvvot máŋgga dásis. Vuosttaš dásis galgá plána mielde ásahuvvot rabas diehtojuohkin-neahttabáiki  áhpeguovlluide. Rabas oassái ásahuvvo doaibmaorganisašuvdna Tromsii. Seammásgo rabas vuogádat ásahuvvo de bargojuvvo maiddái ovdánahttimis giddejuvvon, doaibman vuogádat.  Dát giddejuvvon vuogádat galgá ovttastahttit dieđuid vai šaddá álkibun hálddašit earenoamáš dilálašvuođaid.  Dát  giddejuvvon vuogádat galgá plána mielde čadnojuvvot johtolatguovddážii Várggáin.

BarentsWatch sáhttá šaddat dehálaš reaidun man eiseválddiide addimis dieđuid das mii viiddis áhpeguovlluin davvin dáhpáhuvvá.  Dat sáhttá nannet Norgga rolla áhpeguovlluid ovddasvástideaddji  hálddašeaddjin, ja dáhkida stuora árvvuid. 

Ráđđehus dieđihii juo 2006 davviguovlluáŋgiruššamis ahte sis lei áigumuš ovdánahttit dievaslaš vákšun- ja dieđihanvuogádaga davviguovlluid áhpeguovlluide.  Dán vuogádaga bakte čađat oažžut ođđaseamos dárkkistuvvon dieđuid davviguovlluid áhpe- ja riddoguovlluid birra. Dat sáhttá dáhkidit ollislaš, ođastuvvon dieđuid lihkohisvuođa dilálašvuođain, riskameroštallama áhpedoaimmain, ja nationála ja riikkaidgaskasaš dálkkádat-, resursa ja birasárvvoštallamiid.  Vuogádat sáhttá maiddái leat doarjjan Norgga olgoriikkapolitihkkii.

Olgoriikkadepartemeanta, Guolástus- ja riddodepartemeanta ja Birasgáhttendepartemeanta ásahedje 2009 golggotmánus BarentsWatch prošeaktastivrra ja dasa iežas čállingotti. Dan bargun lei hábmet  vákšun- ja dieđihanvuogádaga vuosttaš veršuvnna, dákko bakte maiddái gollo- ja bušeahtameroštallama, ekonomalaš ja hálddahuslaš váikkuhusaid.  Prošeaktastivra ovddidii loahpparaporttas dáid golmma departemeanttaide 2010 geassemánu 7.beaivvi.

BarentsWatch vuosttaš veršuvdna galgá oktiičadnát dieđuid gávdni norgalaš suorgevuogádagain guovtti ulbmiliin: ásahit rabas diehtojuohkinuskkádaga rabas álbmoga várás, ja lea veahkehit ásaheames ollislaš diehtogovaid mat leat heivehuvvon geavahuvvot hálddahusain ja doaimmain. Vuogádat galgá cehkiid mielde ovdánahttojuvvot, ja eaktuda lagas ovttasbarggu moanaid norgalaš hálddašan- ja dutkanásahusaid gaskkas.  Bargu ahte ásahit giddejuvvon vuogádaga dahkko seammásgo BarentsWatch rabas oassi ásahuvvo.