Johtalusministtar Liv Signe Navarsete:

Buorit fievrridan- ja telebálvalusat sihkkarastet positiiva ovdáneami davveguovlluin

- Buorit fievrridan- ja telebálvalusat leat dárbbašlaččat go galgat ovddidit gávppašeami ja ekonomalaš doaibmama. Ráđđehus danne bargá dan badjelii ahte davveguovlluid johtalusinfrastruktuvra buoriduvvo ain eambbo, ee. vai olbmuid ja ealáhusaid guhkesmátkegolut unniduvvojit.

Nu cealká johtalusministtar Liv Signe Navarsete dan olis go ráđđehus odne bidjá ovdan ”Davveguovlostrategiija” (”Nordområdestrategien”).

- Deaŧalaš lea sihkkarastit Davvi-Norgii njuolgabeassama stuorra riikkaidgaskasaš gávpe­márkaniidda. Dat rahpá vejolašvuođa eambbo ovddidit industriija ja ealáhusaid davvin. Johtalussuorggis lea dárbu buoridit johtaleami nuortti ja oarjji gaskka, lassin buori davi ja luli gaskasaš johtaleapmái. Oassin dan bargui mii dahkkojuvvo Riikkalaš fievrrádusplánain 2010-2019 (Nasjonal transportplan 2010-2019), mii áigut čađahit viiddis analysa dáláš fievrrádus­infrastruktuvrras, vai diehtit makkár doaibmabijut ja prošeavttat sáhttet buoremusat sihkka­rastit ovdáneami. Johtalusdepartemeanta galgá dál čoahkkimastit ja njuolga bargat ovttas golmmain davimus davvi-norgalaš fylkasuohkaniin oažžun dihte čielgasa das, mo mii buoremusat sáhttit ovddidit davveguovlluid fievrrádusvuogádagaid.

- Davveguovlluid positiiva ovdáneapmi sorjá maid das, ahte telefierpmádagas ja elektruvnnalaš gulahallanvuogádagas lea doarvái buorre kapasitehta, ja nu sáhttet dolvvodit stuorra diehtohivvodagaid ja doaibmat ođđa geavahansurggiid várás. Ráđđehus atná deaŧalažžan hukset elektruvnnalaš gullahallama várás buori siskkáldas struktuvrra dakkár teknologiijaiguin maidda gullet satelihtat, sárasfierpmádagat (fiber) ja gádderádiot. Davi ealáhusovddideapmái ja ássamii lea deaŧalaš ahte lea álki beassat IKT-infrastruktuvrii, cealká johtalusministtar.