Stáhtabušeahtta 2012: Johtolat nannejuvvo fas – lassána 2,4 miljárdda ruvnnuin

- 2012 stáhtabušeahta evttohus mielddisbuktá stuora lassánemiid geainnuide ja ruovdemáđiijaide. Dasto ráđđehus čuovvu Našunála fievrredanplána 2010-2019 go joatká lasiheame ruhtajuolludemiid geainnuide ja ruovdemáđiijaide, dadjá johtalusministtar Magnhild Meltveit Kleppa.

Geainnuid ja luottaid vuoruheapmi lea historjjálaš alla dásis. 2012 evttohus lea 31,8 miljárdda ruvnno. Dat lea 8 proseantta lassáneapmi go buohtastahttá 2011 salderejuvvon bušeahtain.

Geainnut

16,3 miljárdda ruvnno geaidnoulbmiliidda– lassána 1,2 miljárdda ruvnnuin
- Historjjálaš alla johtolatbušeahtta addá muni mealgadii lasihit ruhtajuolludemiid geainnuide. Dát addá midjiide buoret geaidnostandárdda. Logi stuorát, ođđa prošeavtta ožžot dál álggahan ruhtajuolludeami prošekteremii ja ráhkkananbargguide, ja máŋga dain besset maiddái álggahit huksenbargguid, dadjá johtalusministtar Magnhild Meltveit Kleppa.
    
Ráđđehus evttoha oktiibuot 16,3 miljárdda ruvnno geaidnoulbmiliidda 2012:s, dat lea 7,8 proseantta lassáneapmi 2011 salderejuvvon bušeahtas.

7,6 miljárdda ruvnno evttohuvvo riikkageainnuid jođiheapmái ja divodemiide, johtaleaddji- ja vuodjinfievrobearráigehččui. Dát lea 5,8 proseantta lassáneapmi 2011 rájes. 

Riikkageainnuid divodemiide evttohuvvo ahte galgá geavahit sullii 1,6 miljárdda ruvnno. Divodemiid doaibmadássi vurdojuvvo leat sullii seamma dásis go 2011:s. Dáinna joatkit nannosit vuoruheame divodemiid. Lassáneapmi 2010:s 2011:ái dahká 60 proseantta.

Lea evttohuvvon sullii 7 miljárdda ruvnno riikkageaidnofierpmádaga geaidnoinvesteremiidda, dasa gullá maiddái uđassihkkarastin. Dát lea 9,7 proseantta lassáneapmi 2011 salderejuvvon bušeahtas.

Lassáneapmi guoská earenoamážit golmma stuora prošektii main leat sierra bušehttapoasttat: E16 badjel Filefjell, E6 Álttá oarjjabealde ja E18 Bjørvika:s  Oslo:s.

Dasa lassin oažžu 5,8 miljárdda ruvnno bummaruđaiguin ja eará olgguldas ruhtademiiguin.

Vuođđun leat biddjon ahte muhtun stuorát prošeavttat dál ožžot álggahan ruhtajuolludemiid prošekteremiidda ja ráhkkananbargguide (badjel 100 miljovnna ruvnno) 2012:s, ja máŋga prošeavtta besset álggahit huksenbargguid:

- E18 Sydhavna, Oslo
- Riksveg 3 Åsta bru oktan ránnágeainnuin, Hedmárku
- E134 Gvammen – Århus, Telemárku
- Riksveg 9 Krokå – Langeid, Nuorta-Agder
- E134 Skjold – Solheim, Rogalánda
- E39 Svegatjørn – Rådal, Hordalánda
- E39 Sogn ja Fjordane:s (oassegaskkat)
- Riksveg 5 Loftesnesbrua Sogn ja Fjordane:s
- E6 Oppdal guovddáš, Lulli-Trøndelága
- E6 Vindalsliene – Korporals bru, Lulli-Trøndelága

Ráđđehus áigu árvvoštallat bummaruhtaproposišuvnnaid 2012:s earret eará dáid stuorát prošeavttaide (badjel 100 miljovnna ruvnno):

- E6 Minnesund – Skaberud, Akershus ja Hedmárku
- E6 Ringebu – Otta, oassegaskka Frya – Sjoa, Oppland
- E16 Fønhus – Bagn – Bjørgo, oassegaskka Fønhus – Bagn, Opplánda
- E39 Eiganestunnelen, Rogalánda
- Riksveg 13 Ryfast, Rogalánda
- E136 Tresfjordbrua ja Vågstrandstunnelen, Møre ja Romsdal
- E6 Vegpakke Helgeland, vuosttaš oassi (Mo – Bolna), Nordlánda
- E6 Hålogalandsbrua, Nordlánda

2012:s dát stuorát riikkageaidnoprošeavttat rahppojit johtolahkii: E16 Nestunnelen, Buskerud, E18 Sky – Langangen, Vestfold ja Telemárku, riikkageaidnu 510 Solasplitten, Rogalánda, E39 Nyborgkrysset, Hordalánda, E39 Torvund - Teigen, Sogn ja Fjordane, E39 Kvivsvegen, Sogn ja Fjordane ja Møre ja Romsdála, riikkageaidnu 70 Brunneset – Øygarden, Møre ja Romsdála ja riikkageaidnu 706 Dorthealyst – Stavne, Lulli-Trøndelága.

Uđassihkkarastimii evttohuvvo 1,075 miljárdda ruvnno, 2011 rájes lassáneapmi mii dahká 2,3 proseantta. 538 miljovnna ruvnno geavahuvvo fylkkageaidnofierpmádaga uđassihkkarastinprošeavttaide, reasta riikkageainnuid.

Vázzin- ja sihkkelastingeainnuid huksemiidda dálá geainnuid guoras evttohuvvo 376 miljovnna ruvdno, juohkásan nu ahte 301 miljovnna ruvnno lea stáhtalaš ruhta ja 75 miljovnna ruvnno lea olgguldas ruhtadeapmi, eanasmuddui bummaruhta. Ruđaid geavahit eanasmuddui dasa ahte oažžut oktilas sihkkelfierpmádagaid gávpogiin ja čoahkkebáikkiin ja huksemiidda skuvlageainnuid guoras.

Dasa lassin gullet dasa vel vázzin- ja sihkkelgeainnuid huksemat mat gullet geaidnofierpmádaga ođđa geaidnohuksemiidda.

- Aiddoásahuvvon stáhtalaš geaidnobearráigeahčču galgá doaimmastis álggahit 2012 vuosttaš jahkebealis. Ráđđehus evttoha bearráigehččui juolludit 11,2 miljovnna ruvnno 2012:s. Geaidnobearráigeahčču galgá bearráigeahččat geaidnoinfrastruktuvrra, dehálaš doaibma go bargá dahkamis geaidnojohtolaga vel sihkkareabbun, dadjá johtalusministtar Magnhild Meltveit Kleppa.

200 miljovnna ruvnno eambbo johtolatsihkarvuhtii 
Ráđđehus evttoha 2012:s johtolatsihkarvuođadoaimmaide 747 miljovnna ruvnno. Dat lea 200 miljovnna eambbo go 2011:s.

- Dađistaga njiedjá lohku olbmuin geat duššet johtolagas, muhto mihttomearrin lea ja bissu ahte ii oktage galgga duššat. Danin mii nannet árjabidjama, dadjá johtalusministtar Magnhild Meltveit Kleppa.

Evttohuvvon ruhtajuolludeapmi deavdá 85 proseantta Stáhta geaidnodoaimmahaga johtolatsihkarvuođa doaibmaprográmma rámmain jagiide 2010-2013.

Geaidnogaskaáiddiid huksen lea vuoruhuvvon doaibma. Dasa lassin johtolatsihkarvuođa dárkkistemiid vuođul vuoruhuvvojit buoret gaskamerken geainnuin, buoret eanadatčorgen geaidnoguorain, luoddačuovggat,  geaidnoearuid- ja geaidnogmohkkálagaid buorideapmi ja dakkaviđe doaimmaid.

2012:s lea jurdda gárvvistit 17 km geaidnogaskaáiddiid huksema guovtti- ja golmmasuorat riikkageainnus. Dasa lassin oažžu 25 kilomehtera riikkageaidnu boahtte jagi buoret gaskamerkema. Oktii 11 kilomehtera ođđa njealjesuorát geainnuin, sirrejuvvon vuodjingeidnodagaiguin, de oktiibuot 53 kilomehtera riikkageaidnu oažžu “gaskadoaimmaid” maiguin hehtte oktiibeaškkehan lihkohisvuođaid.

Ruovdemáđiidja

12,5 miljárdda ruvnno ruovdemáđiija ulbmiliidda – 1 miljárdda ruvnno lassáneapmi 2011 rájes
2012:s lea várrejuvvon 12,5 miljárdda ruvdno ruovdemáđiijaide, lea 8,7 proseantta lassáneapmi 2011 salderejuvvon bušeahta rájes.

- Dáinna ráđđehus láhčá dili dasa ahte vel eambbogat sáhttet geavahit toga, dadjá johtalusministtar Magnhild Meltveit Kleppa.

Dát addá muni álggahit golbma stuorát ruovdemáđiijaprošeavtta, dađistaga váldit atnui 50 ođđa toga, buoridit rievttesáigái boahtima, ásahit ođđa vuođđoruktomodealla ja divodit muhtun stašuvnnaid.

5,28 miljárdda ruvdno geavahuvvo doibmii ja divodemiide. Ráđđehus lea dasto badjelmeare deavdán Našunála johtolatplána plánarámma áigodahkii 2010-2013, dan lea dahkan badjel 1,3 miljárdda ruvnnuin. Plánaáigodaga golmma jagis vástida doaimma ja divodemiid čuovvoleapmi olles 82 proseantta. Vuosttažettiin leat divodeamit nannejuvvon.

Ođasmahttindoaimmat 2012:

• Østfoldgeidnodat: 60 miljovnna ruvnno
• Ođasteamit Oslo-guovllus, mat eai gula Oslo-prošektii, earret eará Alnabru guorbmeterminálas molsunrusttet: 80 miljovnna ruvnno
• Sørlándageidnodat: 100 miljovnna ruvnno
• Bergenageidnodat oktan Randsfjordgeidnodagain ja Roa – Hønefossgeidnodagain: 110 miljovnna ruvnno
• Dovregeidnodat: 170 miljovnna ruvnno
• Nordlándageidnodat: 100 miljovnna ruvnno
• Ofuohtageidnodat: 90 miljovnna ruvnno

4,67 miljárdda ruvdno galgá geavahuvvot infrastruktuvrra investeremiidda. Dát lea lassáneapmi mii dahká sullii 10,1 proseantta. Juolludeapmi sihkkarastá ulbmállaš ovdáneami 2012 stuora huksenprošeavttain. Earenoamážit gusto dát Oslo-prošektii (570 miljovnna ruvnno).

Stuorát investerenprošeavttat:

• Ođđa ruovdemáđigeidnodat gaskkal Farriseidet – Porsgrunn Vestfoldgeidnodat (100 miljovnna ruvnno) áigumuš lea álggahit bargguid  2012:s (ođđa).
• Ođđa duppalgeidnodat gaskkal Langset ja Kleverud Dovregeidnodagas (514 mijovnna ruvnno) áigumuš lea álggahit bargguid 2012:s. Dát lea oktasaš prošeakta Stáhta geaidnodoaimmahagain (ođđa).
• ERTMS signálavuogádahkii ásahit vásáhusgaskka Østfoldgeidnodagas, nuorta linjái (179 miljovnna ruvnno) (ođđa).
• Ođđa duppalgeidnodat Holm – Holmestrand – Nykirke: 839 miljovnna ruvnno (joatkka).

Østlánddaguovllus galgá togafálaldat šaddat vel buoret.  2012 juovlamánus váldojit dađistaga ođđa togat atnui. 2014 juovlamánus ásahuvvo ođđa vuođđoruktomodealla. Ráđđehus evttoha várret 848 miljovnna ruvnno smávit ja stuorát infrastruktuvradoaimmaid láhčimiidda.

619 miljovnna ruvnno lea várrejuvvon stašuvnnaid ja bisánanbáikkiid ođasteapmái.

275 miljovnna ruvnno geavahuvvo Oslo-Ski duppalgeidnodahkii 2012:s. Ođđa geidnodaga ásaheapmi Oslo S:i lea hui gáibideaddji. Plánabargu lea danin ádjánan guhkit go maid álggos doivo, ja Ruovdemáđiijadoaimmahat rehkenastá ahte prošeavttas sáhttá áramusat álggahit huksemiid 2014:s.

2,5 miljárdda ruvdno lea várrejuvvon dasa ahte stáhta oastá fievrredanbálvalusaid togain olbmuide, 13,4 proseantta lassáneapmi 2011 ektui. (šiehtadallamat čađahuvvojit NSB:in). Lassáneapmi gullá dasa go dađistaga galget boahtit 50 ođđa toga, ja maiddái ráhkkaneapmái go Østlándaguovllus galgá buoridit togafálaldaga.  .

Áibmojohtolat

Sihkkaris, birasustitlaš ja beaktilis áibmojohtolat olles riikkas
2012 bušeahttaš evttoha ráđđehus 977, 5 miljovnna ruvnno áibmojohtolatulbmiliidda. Dat lea lagabui 20 miljovnna ruvnno eambbo go 2011:s. Áibmojohtolatfievrredeami oastimiidda lea bušeterejuvvon 705,6 miljovnna ruvnno. Dát lea sullii seamma dásis go 2011:s.

Johtalusdepartemeanta almmuhii 2011 borgemánus ođđa haddefálu dálá 18 ruktoguvlui ja ovtta ođđa ruktoguvlui (Evenášši – Romsa) dainna áigumušain ahte soahpat ođđa šiehtadusaid ruktogirdimiidda cuoŋománu 1.b. 2012 rájes.

- Mii leat maiddái várren ruđa mainna ruhtadit sihkarvuođaiskosa mii galgá buoridit sisriikkahelikopteriid sihkarvuođa, dadjá johtalusministtar Kleppa.

Kollektiivajohtolat

Kollektiivajohtolaga eanet vuoruhit
- 21 miljovnna eanet mátkkošteaddji johte kollektiivvalaččat 2010:s go jagi ovdal. 2012 bušeahtta láhčá dili dasa ahte vel eambbogat sáhttet johtit kollektiivvalaččat, dadjá johtalusministtar Magnhild Meltveit Kleppa.

Ráđđehus evttoha geavahit sullii 13,2 miljárdda ruvnno kollektiivadoaimmaide, 9,1 proseantta lassáneapmi 2010 rájes. Eanasoassi dás,12,5 miljárdda ruvnno, geavahuvvo ruovdemáđiijaulbmiliidda. Dasa lassin geaidnobušeahta bokte boahtá 157 miljovnna ruvnno kollektiivadoaimmaide ja buohkaid beassama várás doaimmaide geaidnofierpmádagas.

Kollektiivajohtolaga earenoamáš doarjagiidda lea várrejuvvon 493 miljovnna ruvdno. Dás lea 411 miljovnna ruvdno várrejuvvon buoret kollektiivajohtolaga bálkkašanortnegii, buori láhčimii sihkkelastiid ja vázziid váste ja unnit biilageavaheapmái gávpotguovlluin.

Ráđđehus evttoha viidáset 45,1 miljovnna ruvnno olámuttosdoaimmaid doarjjaortnegiidda suohkaniid ja fylkkagielddaid ovddasvástádussuorggis. 22 miljovnna ruvdno geavahuvvo guovlluid kollektiivajohtolat-doarjjaortnegii.

Ráđđehus evttoha maiddái álggahit ođđa geahččaleami mas LF-geavaheddjiide, main leat earenoamáš stuora dárbbut, addojuvvo buoret fálaldat (láhččojuvvon fievrredeapmi). Dán geahččaleapmái lea várrejuvvon 10 miljovnna ruvdno. Geahččaleapmi lea čuovvoleapmi dálá geahččaleamis, mas galgá buorebut ovttastahttit LF ja diŋgonfievrredeami, mii loahpahuvvo 2011:s.

Ráđđehus evttoha juolludit 738,5 miljovnna ruvnno stáhta mearrafievrredanbálválusaid oastimii gaskkal Bergen- Girkonjárga. Johtalusdepartemeanta ja fitnodat Hurtigruten ASA leat soahpan ođđa šiehtadusa riddoruktui Bergen-Girkonjárga gávcci jagi áigodahkii, ođđajagimánu 1.b. 2012 rájes. Ođđa šiehtadus sihkkarastá beaivválaš fanasmátkkiid birra jagi gaskkal Bergena-Girkonjárgga ja 32 hámmánii mat dan gaskkas leat.

Stáhtabušeahtta