Rigmor Aasrud nammaduvvon ođasmahttin- ja girkoministariin

Rigmor Aasrud Gran suohkanis Hadelandas eret, lea odne nammaduvvon stáhtaráđđin ja hoavdan Ođasmahttin- ja hálddahusdepartementii ja Kultur- ja girkodepartemeanta girkoossodahkii ja Bargo- ja searvadahttindepartemeanta Sámi- ja unnitálbmotpolitihkalaš ossodahkii. 2009 juovlamánu 20:at beaivvi rádjai sus maiddái lea  ovddasvástádus Bargo- ja searvadahttindepartemeanta doaimmain, earret sisafárrejeaddjiossodaga ja searvadahttin- ja girjáivuođaossodaga doaimmain. Stáhtaráđđi Aasrud lea maiddái davviriikkalaš ovttasbargoministtar.

Rigmor Aasrudas lea guhkes politihkalaš hárjáneapmi Bargiidbellodagas. 2009 son válljejuvvui Stuorradiggái Opplanda fylkkas. Maŋimus njeallje jagi lea son leamašan stáhtačálliin Dearvvašvuođa- ja fuolahusdepartemeantas (DFD). DFD´as son lea bargan departementii gullevaš áššesurggiin, earret eará suohkandearvvašvuođabálvalusain, gearggusvuođaáššiiguin, buohcceviesuid áššiiguin, vuođđodearvvašvuođabálvalusain ja ovttasdoaimmaid ođastusain. Jagi 1992 rájes gitta 1996 rádjai son lei nissonpolitihkalaš čállin Bargiidbellodagas.

Aasrudas lea viiddis báikkálaš politihkalaš duogáš. 1983 son válljejuvvui Gran suohkanstivrii. 10 jagi, 1995 rájes 2005 rádjai, son lei Gran suohkana sátnejođiheaddjin. Son lea maiddái jođihan hálddahuslávdegotti 1987 rájes gitta 1991 rádjai.

Rigmor Aasrud lea Gávpeallaskuvllas (BI) váldán fitnodatekonoma oahpu. Son lea maiddái váldán diehtojuohkinráđđeaddi vuođđofága Lillehammer allaskuvllas.

Ođasmahttin- ja girkoministtar Rigmor Aasrud Šloahtašilljus. Govven: AID