Regjeringen.no sámegilli

Ii galgga dušše leat álkibut ohcat dieđuid ráđđehusa ođđa neahttasiidduin, vuosttaš geardde leat maiddai buot departemeantain sámegielat neahttasiiddut. Dát čielggai go ođasmahttin- ja hálddahusministar Heidi Grande Røys, mánnodaga heaittihi boares neahttabáikki Odin ja rabai regjeringen.no.

- Dat galga leat deaivvadanbáiki ráđđehussii, departemeantaide ja aktiivvalaš oassálasti ja diehtoáŋgiris álbmogii, stáhtaráđđi julggaštii.
Son lohpidii neahttabáikki ođđa teknologiijain, olu buoret beasatlašvuođa ja hámi mii lea heivehuvvon geavaheddjiid eavttuide. Go ozat dieđuid de eai galgga šat buotlágan stuoradiggeproposišuvnnat váttis teavsttain ihttit ohcansiddu bajimussii, muhto dieđut mat buorebut sulastahttet maid ozat. Álgosiiddut galget leat eanet rávvejeaddjin, buoret ođasvuoruhus ja galga leat álkibut gávdnat duogášdieđuid ođđasiidda.

Vuođđodieđut galget leat njealji gillii. Lassin sámegilli de galget maiddái leat dieđut girjedárogilli, ođđadárogilli ja eaŋgalasgilli. Leat maiddái vuhtiiváldan sin geain lea heitot oaidnu ja lohkanváttut. Syntetalaš sárdnun lea gavdnamis sihke girjedárogilli, ođđadárogilli ja eaŋgalasgilli.

- Mun doaivvun ja sávan ahte dát ođasmahttin váikkuha demokratiija nannemii go buohkat álkibut gávdnet dokumeanttaid mat leat politihkkalaš mearrádusaid ja digaštallama vuođđun, lohka Heidi Grande Røys.