- Maŋimuš jagi siste davveguovllut leat boahtán oidnosii Europa-kártii. Olgoriikkalaš mearrádusdahkkit leat fuopmášan ahte davveguovlluin lea mearkkašupmi mii ollá guhkás Norgga rájiid olggobeallai, cealká olgoriikaministtar Jonas Gahr Støre.

Riikkaidgaskasaš beroštupmi davveguovlluin ulbmáda Barents-ábi mariidna resurssaid, máilmmeviidosaš dálkkádathástalusaid mat čielgasit bohtet oidnosii árktalaš guovlluin, ja Ruošša ja Norgga petroleumresurssaid Barents-ábis. Ja eanebut ja eanebut leat beroštiš­goahtán davi erenoamáš luonddus ja ekovuogádagain mat buvttadit daid ealli resurssaid maid lea dárbu seailluhit boahttevaš buolvvaide.

- Min dieđáhus lea ahte norgalaš hálddašeapmi ja bovdehus ovttasbargui lea davveguovlluid nana ja gánnáhahtti ovdáneami vuođđu, cealká Jonas Gahr Støre.

Go ráđđehusa davveguovlluid strategiija čilgejuvvo Romssas odne, de čalmmus áššin lea norgalaš olgoriikapolitihka ođđa viidodat. Ođđa viidodat siskkilda lasi doaimma ja nannoset strategalaš čalmmusteami dasa mo bisuhit dovddus norgalaš beroštumiid, buoridit ovttasbarggu Ruoššain ja oažžut dohkkehusa dasa ahte lea deaŧalaš resurssaid hálddašit jierpmálaččat ja bargat dan badjelii ahte biras seailu ja dálkkádatnuppástusat váldojuvvojit vuhtii. Davveguovloáigumušat mearkkašit maid ahte mii buorebut máhttit dál geahčadit dáid áššiid oktiigullevašvuođa go mii jođihat iežamet olgoriikapolitihka nuppiid riikkaid ektui ja riikkaidgaskasaš forain.

Ráđđehusa davveguovlostrategiija deattuha duohtan ahte guhkesáigásašvuohta ja ovddalgihtii oinnolašvuohta leat deaŧalaš bealit norgalaš davveguovlopolitihkas. Seammás go mii buoridit iežamet álššaid, de mii doaladit Norgga dovdomearkkain davvin. Ráđđehus áigu bisuhit norgalaš beroštumiid lahkaorrumiinnis ja doaimmaidisguin.

- Go mii leat das mielde, ja čuoččuhit suverenitehta ja doaibmat mearridanválddiin, de Norga addá diehttevassii ahte váldá duođas riikkaidgaskasaš ja riikkalaš geatnegasvuođaidis. Danne soahteveaga, politiija ja áššáiskuhttineiseválddiid doaimmat leat ain dálge hirbmat deaŧa­laččat, cealká olgoriikaministtar.

Álbmot-álbmogiin-ovttasbargu lea deaŧalaš oassi norgalaš davveguovlopolitihkas. Dearvvaš­vuohta, oahpahus, kultuvra, valáštallan, mánáid ja nuoraid bargu ja iešdáhtolaš­vuohta leat guovdilis oasit dán ovttasbarggus, ee. go Ruššii viiddiduvvojit oktavuođat. Go olbmot deaivvadit oktasaš doaimmaide dáin guovlluin, de bohciidit ipmárdus ja luohttámušat mat buktet dássitvuođa ja ovdáneami davás. Strategiija ulbmil lea ahte Barents-ovttasbargu ain galgá leat deaŧalaš davveguovlluid olbmuid deaivvadanbáikkiid ja fierpmádagaid huksemii.

Davveguovlopolitihkas min gaskavuohta Ruoššain lea guovdilis ášši. Ruošša ovdána johtilit ekonomalaččat. Ruošša politihka, ekonomiija ja servodaga nuppástusat eai čuoze norgalaš politihka ulbmiliidda, muhto mii fertet čuovvut ovdáneami ja heivehit iežamet váikkuhan­gaskaomiid. Min politihkka Ruošša guvlui galgá leat pragmáhtalaš, beroštusvuđot ja ovttas­bargodáhtolaš.

- Norggas galgá ain leat čielga jietna Ruošša demokratiija ovdáneamis ja olmmošvuoigat­vuođaid ja sátnefriddjavuođa gudnejahttimis. Maiddái dange dáfus min galgá leat vejolaš dovdat, cealká olgoriikaministtar.

Áigumuš lea nannet ovttasbarggu Ruoššain ee. resursa- ja birashálddašeamis Barents-ábis ja energiijaáššiin. Min ovttasbargu galgá nannejuvvot Ruoššain ja eará riikkaiguin bissehan dihte lobihis bivddu Barents-ábis.

Strategiijas dieđihuvvo ovddidanprográmma ruoššalaš studeanttaid várás ja árvalus vuođđudit ekonomalaš ja industriijalaš ovttasbargoavvádaga, mii davi rádjeguovlluin galgá siskkildit sihke norgalaš ja ruoššalaš eatnamiid. Lassin dieđihuvvo ođđa viggamuš álkkásmahttit Norgga ja Ruošša ráji rasttideami beroškeahttá árvaluvvon avvádagas.