Norga ja Ruošša čállet vuollái soahpamuša rádjaássiduođaštusa birra

Davvi dimenšuvnna nuppi olgoriikaministtarčoahkkima oktavuođas Oslos skábmamánu 2. b. Norga ja Ruošša čálle soahpamuša vuollái mii galgá álkkásmahttit Norgga ja Ruošša rádjaássiid mátkkošteami rájá rastá.

-Soahpamuš rádjaássiduođaštusa birra álkkásmahttá mearkkašahtti láhkai rájá goappage beallásaš guovlluid ássiid dili, ja nu dat láhčá dilálašvuođaid dasa ahte Norgga ja Ruošša oktavuođat lassánit ja nanosmuvvet. Dát lea dehálaš lávki vel eambbo rahpat rájá Norgga ja Ruošša gaskasaš lagat oktavuođaide ja ovttasbargui davvin, cealká olgoriikaministtar Jonas Gahr Støre.

Daid osiid ássit Norggas ja Ruoššas mat leat lagabus go 30 kilomehtera eret rájás, ja vel oppa Korzunovo gielda, sáhttet ohcat rádjaássiduođaštusa. Sii guđet ožžot duođaštusa, sáhttet orrut guhkimusat 15 beaivvi hávis visuma haga nuppi riikka rádjaguovllus. Soahpamuš sáhttá guoskat gitta 9 000 ássái Mátta-Várjjaga gielddas ja gitta 45 000 ássái Pečeŋga rajonas Ruošša bealde.

-Soahpamuš nanne guvllolaš ovttasbarggu davvin ja láhčá dilálašvuođaid eanet gáddedoaimmaide, sihke turismii ja eará ealáhusaide. Dat buorida maiddái álbmogis-álbmogii-ovttasbarggu eavttuid guovtti riikkasteamet, cealká gielda- ja guovloministtar Liv Signe Navarsete.

Justiisadepartemeanta lea Norgga bealde jođihan šiehtadallamiid rádjaássiduođaštusa birra, ja dat galgá maid oktiiheivehit ortnega čađaheami.

-Mun lean hui duhtavaš ahte dát soahpamuš lea vuolláičállojuvvon. Mii leat maŋimuš áiggi nannen ovttasbarggu Ruošša eiseválddiiguin justiisasuorggis ge, ja mii leat dahkan soahpamuša dakkár olbmuid máhcaheami birra geain ii leat orrunlohpi nuppi riikkas. Dat doaibmá bures, dadjá justiisaministtar Knut Storberget.

Rádjaássiduođaštus lea lávki stuorát proseassas mii galgá rahpat vejolašvuođaid bargat eambbo ovttasráđiid Norgga-Ruošša rájá rastá. Olgoriikaministara guktos Støres ja Lavrovas leat stuorát ulbmilat Norgga ja Ruošša viidásat ovttasbarggu hárrái, ja oktasaš Norgga-Ruošša julggaštus rádjalagaš ovttasbarggu nannema birra čállojuvvui maiddái vuollái odne.  

-Oktasašjulggaštus rádjalagaš ovttasbarggu nannema birra čájeha ahte Ruoššas ja Norggas lea oktasaš áigumuš das mii guoská ovttasbarggu ovddideapmái davvin. Ollu leat vejolašvuođat dakkár surggiin go ovdamearkka dihtii petroleaávkkástallamis, energiijabeavttálmahttimis ja mátkeealáhusain. Midjiide lea maid ávki nannet ovttasbarggu birrasa ja mearradorvvolašvuođa hárrái, cealká Støre.

-Jus rádjarasttideaddji ovttasbargu galggaš doaibmat, de fertejit leat buorit ortnegat rádjarasttideami, bargiid johtaleami ja tuollodárkkisteami várás. Dálá ortnegiid lea vejolaš dahkat ollu buorebun. Danne leat dát fáttát guovdilat julggaštusas, dadjá olgoriikaministtar.

Olgoriikaministara guovttos áiguba čuovvolit julggaštussii guoski barggu jeavddalaš čoahkkimiinniska.

• Norgga ja Ruošša oktasašjulggaštus
• Fáktaárka
• Oktasašjulggaštus ruoššagillii
• Loga eambbo soahpamuša birra Justiisadepartemeantta siidduin
• Geahča govaid čoahkkimiin ODa Flickr siiddus